काभ्रे (हाम्रो खेलकुद) – बेथानचोक गाउँपालिका, बेथानचोक खेलकुद विकास समितिद्वारा आयोजित चौथो बेथानचोक अध्यक्ष कप वडा स्तरीय फूटबल प्रतियोगिता २०७९ को उपाधि वडा नम्वर ४ को भूमिमाता युवा क्लबले चुमेको छ ।

प्रतियोगितामा वडा नम्वर ४ कै गणेशस्थान युवा क्लब दोश्रो भयो । वडा नम्वर ६ को स्टार युवा क्लबले तेस्रो स्थान हासिल गरेको छ ।

वडा नम्वर ४ को चलाल गणेशस्थानमा शनिबार भएको फाइनलको निर्धारित समयमा २–२ गोलको बराबरीपछि थपिएको समयमा पनि कुनै गोल हुन नसकेपछि प्रतियोगिता ट्राइब्रेकर तर्फ धकेलिएको थियो । त्यसमा भुमेमाताले जित हासिल गरेको हो ।

चौथो बेथानचोक अध्यक्ष कप वडा स्तरीय फूटबल प्रतियोगिता २०७९ मा पहिलो हुने भुमेमाताले ६० हजार रुपैया, प्रमाण पत्र र ट्रफी हात पारेको छ । दोश्रो भएको गणेशस्थान युवा क्लबले ३० हजार, प्रमाण पत्र र ट्रफी तथा तेश्रो भएको स्टार युवा क्लबले १५ हजार रुपैया हात पारेको छ ।

प्रतियोगितामा भूमे माताका सुन्दर तामाङ उत्कृष्ट खेलाडी घोषित भए । भुमेमातार्क प्रकाश तामाङ उत्कृष्ट स्ट्राइकर, गणेशस्थान युवा क्लका सुवास तामाङ उत्कृष्ट गोलरक्षक र गणेशस्थान युवा क्लबका सौभाग्य लामा उच्च गोलकर्ता भए ।

प्रतियोगितामा ‘गेम विनिङ मोमेन्ट’ सिर्जना गर्ने खेलाडीलाई इन्जिनियर अनिष ब्लोनले ५ हजार प्रदान गरे । विजयी टोली तथा खेलाडीलाई बेथानचोक गाउँपालिका अध्यक्ष भगवान अधिकारी, बेथानचोक गाउँपालिका खेलकुद विकास समितिका उपाध्यक्ष भोज बहादुर तिमल्सिनालगायतले पुरस्कृत गरे ।

प्रतियोगिता सम्पन्न पार्न विभिन्न क्षेत्रबाट सहयोग गर्ने करिब १८ जना व्यक्ति तथा संघसंस्थालाई सम्मान गरिएको थियो । वडा नम्वर १ का अध्यक्ष मधुसुधन तिमल्सिना, ३ का अध्यक्ष कुबेर ढकाल तथा ५ का अध्यक्ष राजकुमार लामाको पनि उपस्थिति रहेको थियो । २० मंसिरदेखि शुरु भएको प्रतियोगितामा विभिन्न १६ टोलीको सहभागिता रहेको थियो ।

अध्यक्ष अधिकारीले बेथानचोक गाउँपालिकाले खेलकुदको विकासमा ध्यान दिएको बताउँदै समय समयमा यस्ता प्रतियोगिता गर्दै जाने बताए । खेलले शरीर र मन दुवै स्वस्थ रहने बताउँदै उनले खेलकुदले एकाग्रता, अनुशासनको भाव बनाउने त छँदैछ यसका अलावा खेलकुदले आपसी सदभाव र भाइचारा वृद्धि हुने पनि बताए । वडा स्तरबाटै खेलकुद विकासका लागि र युवाहरुमा खेलभावना वृद्धि गर्न यस्ता प्रतियोगिताले भुमिका खेल्ने बताए ।

नयाँ प्रतिभा जन्मिने र खेलकुदको विकाससँगै यसका पूर्वाधार विकासका लागि पनि आफूहरु जिम्मेवार भएर लागि पर्ने उनले थपे । खेलकुदका पूर्वाधार विकास गर्न सके कृषि र पर्यटनसँगै खेलकुदबाट पनि बेथानचोकले केही गर्नेमा आफू विश्वस्त रहेको उहाँको भनाई छ । खेलकुद मनोरञ्जनका लागि मात्र नभएर राष्ट्रको आधार पनि भएकोले खेलकुदलाई गाउँपालिकाले प्राथमिकतामा राख्नेमा उनले जोड दिए ।