पोखरा (हाम्रो खेलकुद) – युनाइटेड पोखरा क्लब पोखराको आयोजनामा बिहीबारदेखि शुरु हुने युनाइटेड पोखरा भलिबल कपको सहभागी टोली खेल तालिका सार्वजनिक भएको छ ।

आयोजक युनाइटेड पोखरा क्लबले बुधबार सहभागी टोलीसँगै खेल तालिका सार्वजनिक गरेको हो । प्रतियोगितामा महिला र पुरुष दुवैतर्फ समान ६ टोलीको सहभागिता रहेको छ ।

पुरुषतर्फ समूह ‘ए’ मा गण्डकी प्रदेश प्रहरी तालिम केन्द्र, अन्नपूर्ण भलिबल संघ र ठकुरी समाज रहेका छन् । समूह ‘बी’ मा एपीएफ मालेपाटन, मट्टिखान र विन्देश्वरी टाँठी छन् । लिग कम नकआउटपछि हरेक समूहका शीर्ष दुई टोली सेमिफाइनलमा पुग्नेछन् ।

यस्तै महिलातर्फ समूह ‘ए’ मा गण्डकी प्रदेश प्रहरी तालिम केन्द्र, लामाचौर रातो र शान्त मावि रहेका छन् । समूह ‘बी’ मा लामाचौर सेतो, अर्चलबोट र स्पोर्ट्स हब नेपाल रहेका छन् । महिला तर्फ पनि लिग कम नकआउटपछि हरेक समूहका शीर्ष दुई टोली सेमिफाइनलमा पुग्नेछन् ।

प्रतियोगिता बिहीबारदेखि शुरु भएर २५ गते आइतबारसम्म छन्त्याल समाजको भलिबल कोर्ट नदिपुरमा हुनेछ । पुरुषतर्फको विजेताले १ लाख ११ हजार १ सय ११ रुपैया, शिल्ड, मेडल र प्रमाणपत्र प्राप्त गर्नेछन्। दोस्रो हुनेले ६६ हजार ६ सय ६६ रुपैया, शिल्ड, मेडल र प्रमाणपत्र पाउनेछन् ।

महिलातर्फ विजेताले ४४ हजार ४ सय रुपैया, शिल्ड, मेडल र प्रमाणपत्र प्राप्त गर्नेछन्् । दोस्रो हुनेले ३० हजार ३० रुपैया, शिल्ड, मेडल र प्रमाणपत्र प्राप्त गर्नेछन् ।