काठमाडौं (हाम्रो खेलकुद) – फ्रान्सको मार्सेली शहरमा हालै सम्पन्न भएको एफआईए विश्व मोटर स्पोर्टस च्याम्पियनसिपमा सहभागी भएको नेपाली टोलीलाई नेपाल अटोमोवाइल एसोसियसन (नासा) ले सम्मान गरेको छ ।

पर्यटन तथा नागरिक उड्डयन मन्त्री जीवनराम श्रेष्ठ ले खेलाडीहरु अनिल कुमार बराल, दिप्रश शाक्य, जिस्वान तुलाधर एवं अफिसियल यदुराम लामिछाने र सिर्जना बराल लाई बिहीबार सम्मान गरेका हुन् । मोटर स्पोटसको अन्तराष्ट्रिय महासंघ फेडरेसन इन्टरनेशनल डे अटोमोबाइल (एफआईए) ले आयोजना गरेको विश्वकप सरहको सो प्रतियोगितामा नेपालको सहभागिता पहिलो पटक भएको थियो ।

मोटर स्पोटस का १७ वटा विभिन्न विधाका खेलहरु समावेश गरिएको सो प्रतियोगितामा विश्वका ७० देशका एक हजार भन्दा बढीको सहभागिता रहेको थियो । नेपालमा मोटर स्पोर्टसको लागि आवश्यक भौतिक पूर्वाधार एवं प्रशिक्षणको अभावका बावजुद पनि आफूहरुले स्तरिय प्रदर्शन गरेको जनाउँदै शाक्यले अन्य देशका खेलाडी र प्रशिक्षकले पनि नेपालीको प्रदर्शनको प्रशंसा गरेको बताए ।

नासाका अध्यक्ष दशरथ रिसालले विश्वकप सरहका ओलम्पिक फरम्याटमा सन्चालन गरिएको उत्कृष्ट खेल मोटर स्पोर्टसमा नेपालले भाग लिन पाउनु एउटा गौरवान्वीत क्षणको बताए । उनले भविष्यमा विश्वस्तरिय प्रतियोगितामा नेपाली खेलाडीले पदक जित्ने आशा व्यक्त गरे ।