काठमाडौं (हाम्रो खेलकुद) – प्रदीप खड्का र अभिलाषा विष्टले दोस्रो संस्करणको वीर गणेशमान सिंह राष्ट्रिय टेनिस प्रतियोगिताको उपाधि जितेका छन् ।

सातदोबाटोस्थित टेनिस कोर्टमा शनिबार पुरुष एकलतर्फ प्रदीप र महिला एकलतर्फ अभिलाषा च्याम्पियन बनेका हुन् ।नम्बर एक प्रदीपले फाइनलमा ऋतिक रानालाई ६–४ र ६–४ को सोझो सेटमा हराएर उपाधि जिते ।

प्रदीप नवौं राष्ट्रिय खेलकुदको समेत स्वर्ण विजेता हो । निशान श्रेष्ठ र प्रणव खनाल तेस्रो भए । महिला एकलतर्फ अभिलाषाले फाइनलमा सुनीरा थापालाई ६–२ र ७–६ ले पराजित गरिन् । आयिशा डोल्कर गुरुङ र सर्भानी श्रेष्ठ तेस्रो भइन् ।

पुरुष डबल्समा ऋतिक राना र निशान श्रेष्ठको जोडी पहिलो भए । यो जोडीले प्रदीप खड्का र प्रणव खनालको जोडीलाई हराए । सक्षम बिक्रम शाह र राजबिर प्रधान तथा केशव प्रसाद गौचन र शौरभ नाथ पन्तको जोडी तेस्रो भए ।

जितेन्द्र परियारलाई पराजित गर्दै कमल बहादुर भण्डारीले ३५ वर्षमाथिको पुरुष एकलमा उपाधि जिते । सन्तोष खत्री र सिमान्त गुरुङ तेस्रो भए । ४५ वर्षमाथि महेश श्रेष्ठले उपाधि जित्दा विमल कुमार गुरुङलाई हराए । रोहित सुनुवार र मनोज बिक्रम शाह तेस्रो भए ।

पुरुषकै ५५ वर्षमाथि एकलको उपाधि विमल कुमार गुरुङले हात पारे। उत्तम कुमार लामा दोस्रो तथा जीवन घिमिरे र निराजन श्रेष्ठ संयुक्त तेस्रो भए । पुरुषको ६५ वर्षमाथि एकलको उपाधि बिदुर विष्टले हात पारे। ज्ञानेन्द्र मान ताम्राकार दोस्रो तथा हर्क बहादुर गुरुङ तेस्रो भए।

३५ वर्षमाथिको पुरुष डबल्सतर्फको उपाधि कमल भण्डारी र यज्ञ भण्डारीको जोडीले जितेका छन्। सन्तोष खत्री र सिमान्त गुरुङको जोडी दोस्रो हुँदा राजु क्षेत्री र ईश्वर जिसी तथा नरेश बहादुर र विनय मान तुलाधरको जोडी तेस्रो भए ।

पुरुष ४५ वर्षमाथिको डबल्समा डिगेन्द्र श्रेष्ठ र चन्द्र शाहीको जोडीले उपाधि जिते । सुदर्शन विष्ट र राजु क्षेत्रीको जोडी दोस्रो भए । ५५ वर्षमाथि पुरुष डबल्सको उपाधि कृष्ण घले र शुवर्ण धाख्वाको जोडीले हात पारे । निरन्जन श्रेष्ठ र राम रानाको जोडी दोस्रो भए ।

महिला र पुरुष एकल विजेताले ट्रफी मेडलसहित ८० हजार, दोस्रोले ४० र तेस्रोले २० हजार नगद पुरस्कार प्राप्त गरे । पुरुष डबल्सको विजेताले ४० हजार, उपविजेताले २० हजार र तेस्रोले १० हजार प्राप्त गरे ।

पुरुष ३५ वर्षमाथि एकलका शीर्ष तीनले क्रमशः ४० हजार,२० हजार र १० हजार प्राप्त गर्दा पुरुष ३५ वर्षमाथि डबल्सका शीर्ष तीनले २५ हजार,१५ हजार र ५ हजार पाएका छन् ।

पुरुष ४५ वर्षमाथि एकलतर्फको शीर्ष तीनले ३० हजार, १५ हजार र ५ हजार प्राप्त गर्दा ४५ वर्षमाथि डबल्सकाले २० हजार,१० हजार र ५ हजार प्राप्त गरे ।

५५ वर्षमाथिका एकलले २० हजार,१० हजार र ५ हजार , ५५ वर्षमाथि डबल्सले १५ हजार, ८ हजार र ८ हजार तथा ६५ वर्षमाथिका शीर्ष तीनले १५ हजार, ७ हजार ५ सय र ५ हजार नगद पुरस्कार प्राप्त गरे ।

विभिन्न २३ इभेन्ट्समा प्रतिस्पर्धा भएको प्रतियोगिताको विजयी खेलाडीलाई नेपाली कांग्रेसका नेतृ सिर्जना सिंह, नेपाल लनटेनिस संघका अध्यक्ष तथा नेपाल ओलम्पिक कमिटिका उपाध्यक्ष ज्योती राणा, गणेशमान सिंह फाउण्डेशनका बोर्ड सदस्य तथा प्रतियोगिता संयोजक भाष्करमान सिंह, वीर गणेशमान सिंह स्पोर्ट्स कमिटिका संयोजक सन्जिब तुलाधरलगायतले पुरस्कृत गरे ।