काठमाडौं (हाम्रो खेलकुद) – ऋतिक राना र निशान श्रेष्ठको जोडीले दोस्रो संस्करणको वीर गणेशमान सिंह राष्ट्रिय टेनिस प्रतियोगिता अन्तर्गत पुरुष डबल्सतर्फको उपाधि जितेका छन् ।

सातदोबाटोस्थित टेनिस कोर्टमा सोमबार भएको फाइनलमा प्रदीप खड्का र प्रणव खनालको जोडीलाई ७–६ र ४–६ (१०–५) ले हराएर ऋतिक र निशानको जोडी च्याम्पियन बनेको हो ।

३५ वर्षमाथिको पुरुष डबल्सतर्फको उपाधि कमल भण्डारी र यज्ञ भण्डारीको जोडीले जितेका छन् । यू–८ गल्समा थिया श्रेष्ठलाई १०–२ र १०–५ ले हराएर सारा पन्तले उपाधि जितेकी छिन् ।

यू–१० को ब्वाइजतर्फ सुजन कुइकेल र गल्समा साल्भी शेरचनले उपाधि हात पारे । यू–१२ गल्समा शिभाली गुरुङ च्याम्पियन बनिन् । यू–८ ब्वाइजमा आर्यश राज पौडेल र सभ्य जङ कार्की तथा यू–९ ब्वाइजमा सुजन कुइकेल र आर्यश राज पौडेलले फाइनलको यात्रा तय गरे । यू–९ गल्सको उपाधिका लागि जेनिशा ज्ञवाली र अनुश्री धोजु भिड्नेछन् ।

यू–१२ ब्वाइजमा असभ सम्राट हाडा र बृजेश अग्रवाल तथा यू–१४ को ब्वाइजमा आयुष्मान हजुर घले र बोरिस अधिकारीले प्रतिस्पर्धा गर्नेछन् । यू–१४ गल्सतर्फ सुनिरा थापा र शिभाली गुरुङले खेल्नेछिन् ।

पुरुष डबल्सको ४५ वर्षमाथि डिगेन्द्र श्रेष्ठ र चन्द्र शाहीको जोडी तथा सुदर्शन विष्ट र राजु क्षेत्रीको जोडीले फाइनलमा खेल्नेछन् । ५५ वर्षमाथि डबल्समा कृष्ण घले र सुवर्ण धाखवाको जोडी र निरन्जन श्रेष्ठ र राम रानाको जोडीले प्रतिस्पर्धा गर्ने छन् ।