काठमाडौं (हाम्रो खेलकुद) – नेपालले बंगलादेशको ढाका र कक्स बजारमा डिसेम्वरमा आयोजना हुन लागेको काभा यू२३ पुरुष भलिबल च्याम्पियनसिपसँगै सिनियर पुरुष र महिला बिच भलिबल प्रतियोगितामा सहभागिता जनाउने भएको छ ।

नेपाल भलिबल संघको मंगलबार बसेको बैठकले काभा यू२३ पुरुष भलिबल च्याम्पियनसिपसँगै सिनियर पुरुष र महिला बिच भलिबल प्रतियोगितामा सहभागिता जनाउने निर्णय गरेको हो । काभा यू२३ पुरुष भलिबल च्याम्पियनसिप ढाकामा २० देखि २७ डिसेम्वरमा हुनेछ ।

यसका लागि संघले टोली निर्माणको लागि खुल्ला छनोट गर्ने जनाएको छ । खुल्ला छनोट कार्तिक २१ देखि २३ सम्म त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा हुनेछ । संघले खेलाडी छनोटका लागि सात वटै प्रदेशसँगै विभिन्न क्लबलाई यसमा सहभागिताको लागि अनुरोध गरेको छ ।

खेलाडी छनोट लगत्तै तत्कालै बन्द प्रशिक्षण सुरु गरिने संघले जनाएको छ । नेपालले पहिलोपटक यू२३ पुरुष भलिबल टिम निर्माण गर्न लागेको हो । काभा यू२३ पुरुष भलिबल च्याम्पियनसिप पनि पहिलोपटक हुन लागेको हो ।

त्यसैगरी काभा बिच भलिबल प्रतियोगिताको लागि खुल्ला छनोटमा सहभागी हुनका लागि सबै पुरुष तथा महिला खेलाडीलाई पनि आग्रह गरिएको छ । काठमाडौंमा हुने खुल्ला छनोपछि एक पुरुष र एक महिला टोलीले नेपालको प्रतिनिधित्व गर्नेछ । बिच भलिबलका लागि खेलाडी छनोट २१ देखि २३ कार्तिकसम्म काठमाडौंमा नै हुनेछ ।

यू२३ छनोट समितिको संयोजकमा जितेन्द्र श्रेष्ठ र बिच भलिबल छनोट समितिको संयोजकमा जुनु पुन रहेका छन् ।