काठमाडौं (हाम्रो खेलकुद) – नेपाली महिला राष्ट्रिय महिला भलिबल टोलीकी महत्वपूर्ण सदस्य प्रतिभा माली चन्द्रागिरि स्पोर्ट्स अवार्डबाट सम्मानित भएकी छिन् ।

चन्द्रागिरि स्पोर्टस् एकेडेमीले प्रतिभालाई शनिबार पाँचौं संस्करणको नैकाप गोल्डकपको फाइनल दौरान अवार्डबाट सम्मानित गरेका हुन् । अवार्डसँगै उनले ५० हजार रुपैयाँ हात पारेकी छिन् । उनलाई नागार्जुन नगरपालिकाका मेयर मोहन बस्नेत र क्लबका अध्यक्ष कृष्णहरि बस्नेत लगायतले पुरस्कृत गरे ।

चन्द्रागिरि स्पोर्टस् एकेडेमीले यस वर्षदेखि चन्द्रागिरि नगरपालिकामा स्थायी बसोबास गर्ने एक जना खेलाडीलाई अवार्डबाट सम्मानित गर्ने निर्णय बमोजिम यसपटक नेपाली खेलकुद क्षेत्रमा पु¥याएको योगदानको कदर गर्दै भलिबलकी प्रतिभा मालीलाई सम्मानित गरिएको एकेडेमीका अध्यक्ष कृष्णहरि बस्नेतले जानकारी दिए ।

अवार्डबाट सम्मानित भएसँगै प्रतिभाले सम्मान गर्ने चन्द्रागिरि स्पोर्टस् एकेडेमीलाई धन्यवाद व्यक्त गर्दै यस अवार्ड पाउनुको श्रेय न्यू डायमन्ड एकेडेमी (न्यू डायमन्ड युथ स्पोर्ट्स क्लब) र एकेडेमीका प्रिन्सिपल तथा प्रशिक्षक कुमार राई रहेको बताउँदै अवार्ड समर्पण गरिन् ।

‘यो अवार्ड पाउनुको श्रेष्ठ न्यू डायमन्ड एकेडेमी र गुरु कुमार राई नै हुन् । उहाँहरुकै कारण मैले यो अवार्ड पाउन सके । यो अवार्ड उहाँहरुलाई नै समर्पण गर्न चहान्छु ।’ अवार्डबाट सम्मानित भएपछि प्रतिभाले भनिन्, ‘यस किसिमको सम्मानले खेलाडीहरूमा अझ उत्कृष्ट खेल कौशल देखाउन हौसला मिल्ने छ । अवार्ड प्रदान गर्ने आयोजकलाई धन्ववाद ।’

प्रतिभा नेपाली महिला भलिबलले प्राप्त गरेको पछिल्लो सफलताको हिस्सा हुन् । सन् २०१९ मा नेपाल बंगलादेशमा पहिलो एभिसी एसिन सेन्ट्रल जोनको च्याम्पियन बन्दा उनी टोलीकी महत्वपूर्ण सदस्य थिइन् ।

सोही वर्ष नेपालमा भएको १३औं दक्षिण एसियाली खेलुकद (साग) मा महिला टोलीले ऐतिहासिक फाइनलको यात्रा तय गर्दा उनी टोलीको महत्वपूर्ण सदस्य थिइन् । त्यसपछि गत वर्ष नेपाल पुनः सेन्ट्रल जोनको च्याम्पियन बन्दा उनको प्रदर्शन गज्जवको थियो ।

घरेलु भलिबलमा प्रतिभा न्यू डायमन्ड युथ स्पोर्ट्स क्लबबाटै खेल्ने गर्दछिन् । उनकै उच्च प्रदर्शनमा डायमन्डले घरेलु भलिबलमा थुप्रै उपाधि जितेका छन् । गत वर्ष राष्ट्रिय स्तरको ६ प्रतियोगिता आयोजना हुँदा डायमन्डले तीन उपाधि (एनभिए क्लब च्याम्पियनसिप, दमक कप र लोक बहादुर पुन स्मृति कप) जितेको थियो ।

आफ्नो पुरानो चोट बल्झिएपछि प्रतिभाले नेपालगन्जमा भएको प्रधानमन्त्री कपपछि खेलेका थिएनन् । उनले गण्डकी प्रदेशको म्याग्दीमा भएको नवौं राष्ट्रिय खेलकुदबाट कोर्टमा पूनरागमन गरिसकेकी छिन् । नवौंमा प्रतिभाले बागमती प्रदेशबाट खेल्दै कास्यपदक जित्न सफल भइन् ।