तनहुँ (हाम्रो खेलकुद) – नवौं राष्ट्रिय खेलकुद अन्तर्गत तनहुँमा भएको महिला बास्केटबल प्रतियोगितामा त्रिभुवन आर्मीले स्वर्ण पदक हात पारेको छ ।

बुधबार भएको फाइनलमा आर्मीले बाग्मती प्रदेशलाई ४५–३० को अन्तरमा पराजित गर्दै स्वर्ण जितेको हो । पहिलो र दोस्रो क्वाटमा आर्मीले १०–८ र १४–७ को अग्रता कायम गरेको थियो । तेस्रो चरणमा भने वाग्मतीले उत्कृष्ट खेल प्रदर्शन गरि १२–८ को अग्रता लियो । अन्तिम चरणमा वाग्मतीको कमजोर खेल प्रदर्शनको फाइदा उठाउदै आर्मीले १३–३ को फराकिलो अन्तर बनायो ।

आर्मीको जितमा प्रतीक्षा मगरले ११ अंक जोडेकी थिइन । सेमिफाइनल खेलमा वाग्मती प्रदेशले सुदुरपश्चिम प्रदेशलाई र आर्मीले गण्डकी प्रदेशलाई पराजित गर्दै फाइनलको यात्रा तय थियो ।

यसै गरि थ्री बाइ थ्री महिला बास्केटबलमा एपीएफले स्वर्ण पदक हात पारेको छ भने त्रिभुवन आर्मीले रजत पदक हात पारेको छ । बागमती प्रदेशलाई ९–७ अंकको अन्तरमा गण्डकीले काँस्य पदक हात पारेको छ ।

बास्केटलब फाइभ अन फाइभ प्रतियोगितामा गण्डकी र एपीएफ फाइनलमा प्रवेश गरेका छन् । बुधबार भएको खेलमा गण्डकीले आर्मीलाई ७०–६६ स्कोरले हराउँदै फाइनलमा प्रवेश गरेको हो ।

पोखरा रंगशालास्थित ब्याडमिन्टन कोर्टमा एपीएफले बागमती प्रदेशलाई हराएर फाइनलमा प्रवेश गरेको छ । एपीएफले बागमती प्रदेशलाई ९२–६५ स्कोरले पराजित गर्न सफल भयो ।

फाइनल खेल गण्डकी र एपीएफबीच बिहीबार हुँदैछ । कास्यका लागि आर्मी र एपिएफबीच प्रतिस्पर्धा हुनेछ ।