पोखरा (हाम्रो खेलकुद) – नवौं राष्ट्रिय खेलकुद अन्तरगत ब्याडमिन्टनको एकलतर्फ पुलिसका प्रिन्स दाहाल र आर्मीकी रशिला महर्जन राष्ट्रिय च्याम्पियन बन्दै स्वर्ण जित्न सफल भएका छन् ।

पोखराको रंगशालास्थित ब्याडमिन्टन कभर्डहलमा बुधबार भएको पुरुष एकलमा प्रिन्सले पुलिसकै बिष्णु कटुवाललाई २१–११ र २१–४ ले पराजित गर्दै नयाँ राष्ट्रिय च्याम्पियन बनेका हुन् ।

यसअघि आठौं राष्ट्रिय खेलकुद प्रतियोगितामा दिपेश धामी राष्ट्रिय च्याम्पियन भएका थिए । लुम्बिनीका ईरफान अन्सारी र सेनाका प्रफुल महर्जनले कास्य पाए ।

महिला एकलतर्फ आर्मीकी रशिला महर्जनले आफ्नै टोलीकी अनुमाया राईलाई २२–२० र २१–९ को जित निकाल्दै राष्ट्रिय च्याम्पियन बनिन् । महर्जन आठौंको समेत च्याम्पियन हुन् ।

मिक्स युगलतर्फ पुसिलका जीवन आचार्य र निता लम्सालको जोडीले आर्मीका प्रफुल महर्जन र रशिला महर्जनको जोडीलाई २१–१२ र २१–११ को सहज जित निकाल्दै स्वर्ण जित्न सफल भए । गण्डकीका बिशाल खड्का र याम कुमारी गुरुङको जोडी तथा आर्मीका सुरोज महर्जन र अमिता गिरीको जोडी तेश्रो भए ।

महिला युगलतर्फ आर्मीका अमिता गिरी र रशिला महर्जनको जोडीले सेनाकै प्रार्थना देउवा र अनुमाया राईको जोडीलाई २१–१५ र २२–२० को सेटमा जित निकाल्दै स्वर्ण जिते । प्रदेश १ का रोजी राइ र सृष्टि राईको जोडी तथा एपिएफका जेशिका गुरुङ र सुनयना मुखियाको जोडीले कास्य पदक प्राप्त गरे ।

पुरुष युगलमा सेनाका प्रफुल महर्जन र रुकेश महर्जनको जोडीले पुलिसका प्रिन्स दाहाल र सुदीप सेढाइको जोडीलाइ २१–१९, २१–१७ ले पराजित गर्दै सेनाका लागि अर्को स्वर्ण जिते ।

तेश्रो स्थानमा पुलिसका जीवन आचार्य र विष्णु कटुवालको जोडी तथा गण्डकीका बिधान अधिकारी र भुगोल गुरुङको जोडी रहे । यससँगै आर्मीले ब्याडमिन्टनबाट ७ मध्ये ५ स्वर्ण जितेको छ । नेपाल पुसिलसे २ स्वर्ण हात पा¥यो ।