पोखर (हाम्रो खेलकुद) – नेपाल एपिएफ क्लबका लागि निशा बलालले नवौं राष्ट्रिय खेलकुदअन्तर्गत भारोत्तोलनमा पहिलो स्वर्ण पदक जितेकी छिन् । पोखरा उद्योग वाणिज्य संघको हलमा बुधबार महिला ८७ केजी तौल समूहमा निशालले स्वर्ण पदक जितेकी हुन् । उनले स्न्याचमा ६२ र क्लिन एण्ड जर्कमा ७७ गरी कुल १ सय ३९ केजी भार बहन गर्दै एपिएफलाई पहिलो स्वर्ण दिलाएकी हुन् ।

नेपाल पुलिस क्लब र त्रिभुवन आर्मी क्लबको दबदबा रहँदा मंगलबारसम्म एपिएफले ३ रजत र २ कास्य पदक जितेको थियो । बुधबार स्वर्ण जित्दै पदक तालिकामा एपिएफको कुल पदक संख्या ६ पु¥याएको छ । निशाले स्वर्ण जितेको तौल समूहमा पुलिसकी जयन्ती श्रेष्ठले स्न्याचमा ६३ र क्लिन एण्ड जर्कमा ७४ गरी कुल १ सय ३७ केजी भार बहन गरेर रजत जितिन् ।

आर्मीकी अस्मिता राई कास्य जित्ने क्रममा स्न्याचमा ५७ र क्लिन एण्ड जर्कमा ८८ गरी कुल १ सय २५ केजी भार उठाइन् ।
बुधबार पुलिसकी विद्या राईले स्न्याचमा कीर्तिमान कायम गर्दै स्वर्ण जितिन् । ८७ केजी माथि तौल समूहमा उनले स्न्याचतर्फ ७६ र क्लिन एण्ड जर्कमा ८८ गरी कुल १ सय ६४ केजी भार बहन गर्दै पहिलो स्थान प्राप्त गरिन् । स्न्याचमा यसअघि ७५ केजीको कीर्तिमान रहेकोमा विद्याले १ केजी बढी भार बहन गरेको रेफ्री सञ्जय महर्जनले जानकारी दिए ।

एपिएफकी शिखा थापाले रजत र गण्डकीकी सिन्जल गुरुङले कास्य पदक जितिन् । शिखाले स्न्याचतर्फ ४० र क्लिन एण्ड जर्कमा ५३ गरी कुल ९३ केजी भार बहन गरिन् भने गण्डकीलाई पहिलो कास्य दिलाउन सिन्जलले स्न्याचमा ४० र क्लीन एण्ड जर्कमा ५० सहित ९० केजी भार उठाईन् । घरेलु टोली गण्डकीले यसअघि रजत जितेको थियो ।

२० स्वर्णसहित ६० पदकका लागि भएको प्रतिस्पर्धा बुधबार सम्पन्न हुनेछ । हालसम्म १६ स्वर्णको टुंगो लगिसकेको छ । जसमा पुलिसले ९, आर्मीले ४, सुदूरपश्चिमले २ स्वर्ण र एपिएफले १ स्वर्ण पदक जितेको छ ।