महिला हक्कीमा आर्मी च्याम्पियन

पोखरा (हाम्रो खेलकुद) – त्रिभुवन आर्मी क्लबले नवौं राष्ट्रिय खेलकुद महिला हक्कीमा स्वर्ण पदक जितेको छ । पोखरास्थित गण्डकी बोर्डिङ स्कुलको मैदानमा बुधबार भएको फाइनल गण्डकी प्रदेशलाई टाइब्रेकरमा ३–० गोल हराउँदै आर्मीले स्वर्ण पदक जितेको हो ।

टाईब्रेकरमा आर्मीका लागि सीताकुमारी चौधरी, सरस्वती तामाङ र सितामाया बलले गोल गरे । निर्धारित समय १–१ को बराबरीमा टुंगिएको थियो । खेलको नवौं मिनेटमा सरस्वती तामाङको गोलबाट आर्मीले अग्रता लिएको थियो । त्यसको दुई मिनेटपछि गण्डकीकी सबिना पुन राना बराबरी गोल फर्काएकी थिइन् ।

सुदूपश्चिमले कास्य पदक जितेको छ । बुधबार विहान भएको खेलमा सुदुरपश्चिमले प्रदेश १ लाई २–० गोल हराउँदै तेस्रो स्थान प्राप्त गरेको छ । सुदूरपश्चिमका लागि खेलको १० औं मिनेटमा निलम जोशी र २६ औं मिनेटमा डम्बरा थापाले गोल गरेकी थिइन् । महिला हक्कीमा ७ टोलीको सहभागिता थियो ।