पोखरा (हाम्रो खेलकुद) – गण्डकी प्रदेशका अनिष थापा मगरले नवौं राष्ट्रिय खेलकुद अन्तरगत पुरुष म्याराथनमा स्वर्ण जितेका छन् ।

पोखरा रंगशालास्थित एथलेटिक्स ट्रयाकमा आर्मीका धावक कृष्ण बस्नेतलाई पछि पार्दै अनिषले स्वर्ण जित्न सफल भएका हुन् ।उनले निर्धारित (४२.१९५ किलोमिटर) दुरी २ घन्टा २२ मिनेट ५४ सेकेन्डमा पूरा गरे ।

आर्मीका कृष्णाले २ घन्टा २३ मिनेट १४ सेकेन्डमा दुरी पार गर्दै रजतपदक जित्न सफल भए । एपिएफका सन्तोष विक्रम विष्टले २ घन्टा ३० मिनेट ५४ सेकेन्डमा दुरी पार गर्दै कास्य पदक जित्न सफल भए ।

स्वर्ण जितेपछि अनिषले आफ्नो प्रदर्शनबाट सन्तुष्ट रहेको र यो जित आफ्ना गुरुहरुलाई समर्पण गर्न चाहेको बताए । ‘तयारी ठीकै थियो । म्याराथन गाह्रै हुन्छ ।’ स्वर्ण जितेपछि भारतीय सेनामा कार्यरत अनिषले भने, ‘१ महिनाको छुट्टीमा नेपाल आएको थिए । त्यतिबेला नै गुरुहरुले म्याराथन हुँदैछ भन्नुभयो । ट्रायलमा आए, त्यसमा सफल भए । खुशी छु । रुट एकदमै राम्रो थियो, तर आफ्नो समयलाई भने सुधार गर्न सकिन ।’

भारतीय सेनामा १३ वर्ष जागिर पुरा गरिसकेका अनिषले भारतमा आर्मीभित्रै १० किमि र क्रस कन्ट्रीमा प्रतिस्पर्धा गर्दै आइरहेका छन् । राष्ट्रिय खेलकुदमा सहभागिता जनाएको तेस्रो प्रयासमा उनले स्वर्ण जित्न सफल भएका हुन् । २०६५ मा काठमाडौंमा भएको पाँचौ राष्ट्रिय खेलकुदमा तत्कालिन पश्चिमाञ्चलबाट खेल्दा पदक जित्न नसकेको अनिषले त्यसपछि आठौंमा १० हजार मिटरमा रजत जितेका थिए ।

घरेलु मैदानमा स्वर्ण जित्न पाउँदा खुशी छु । मलाई जसरी पनि जित्नुपर्ने थियो । पहिलेबाट नै जित्ने सोचिसकेको थिए ।’ पर्वतका ३३ वर्षे अनिषले भने, ‘राष्ट्रिय टोलीमा बोलाइएको खण्डमा समय मिलाएर नेपालको प्रतिनिधित्व गर्न आउनेछु । नेपालको प्रतिनिधित्व गर्न पाउनु ठुलो कुरा हो ।’