पोखरा (हाम्रो खेलकुद) – शारीरिक सुगठनमा आर्मीले ५९ अंकका साथ टिम च्याम्पियन बन्न सफल भएको छ । पोखरास्थित सभागृहमा सोमबार ६ स्वर्णका लागि भएको प्रतियोगिताको ८० केजी तौलमा नेपाली सेनाका ललित धिमालले स्वर्ण जिते ।

एपिएफका राकेश श्रेष्ठले रजत तथा पुलिसका रत्न सुन्दर नायकुसीले कास्य जिते । ८० केजी माथिको तौल समूहमा आर्मीका उमेश राईले स्वर्ण, लुम्बिनीका बिष्णु निशादले रजत तथा एपिएफका आदित्य ठाकुरले कास्य जिते । स्पोर्टस् फिजिक १७० सेमी तलको समूहमा गण्डकी प्रदेशका प्रदीप रेग्मीले पुलिसका सुकदेव कार्कीलाई पछि पार्दै स्वर्ण जिते ।

एपिएफका किरण सुवालले रजत जिते । १७० सेमी माथीको विधामा प्रदेश १ का औतार श्रेष्ठले स्वर्ण जितेका हुन् । एपिएफका निहाल जोशीले रजत र नेपाल पुलिसका सुरज डङ्गोलले कास्य पाए ।

महिला मोडल फिजिकतर्फ नेपाली सेनाकी स्वेता कपालीले स्वर्ण जितिन् । बागमती प्रदेशकी रोजिना ख्यामली र पुलिसकी सनम मुलगुठीले रजत र कास्य जिते । महिला शारीरिक सुगठनमा एपिएफकी पुजा श्रेष्ठले बाजी मारिन् ।

उनले सेनाकी जास्मिन लामालाई रजतमा खुम्च्याउँदै स्वर्ण कब्जा गरेकी हुन् । प्रदेश १ की रजनी श्रेष्ठले कास्य जितिन् । प्रतियोगितामा महिला र पुरुष दुवैतर्फ गरी कुल १०-१० इभेन्टमा खेल हुनेछ । जसमा महिला ७६ र पुरुष ९६ गरी कुल १ सय ७२ जना खेलाडीले भाग लिएका छन् । प्रतियोगितामा २० स्वर्णका लागि प्रतिस्पर्धा हँुदैछ ।