म्याग्दी (हाम्रो खेलकुद) – बागमती प्रदेश, नेपाल पुलिस क्लब र गण्डकी प्रदेश नवौं राष्ट्रिय खेलकुद अन्तरगत महिला भलिबलतर्फ सेमिफाइनलमा प्रवेश गरेका छन् ।

म्याग्दीको बेनीस्थित खुल्ला मञ्चमा सोमबार भएको क्वाटरफाइनलमा आ–आफ्ना प्रतिद्धन्द्धीलाई पराजित गर्दै अन्तिम चारमा स्थान तय गरेका हुन् ।

दोस्रो क्वाटरफाइनलमा बागमती प्रदेशले सुदूरपश्चिम प्रदेशलाई ३–० को सोझो सेटमा हराउँदै सेमिफाइनलमा एपिएफसँगको भेट पक्का गरेको हो ।

पहिलो र दोस्रो सेटमा २५–१२ र २५–१५ को सोझो सेटमा जित निकालेको बागमतीले २५–२३ को प्रतिस्पर्धात्मक जित निकाल्न सफल भयो । बागमतीकी प्रगतिनाथ खेलको वुमन्स अफ दि म्याच भइन् ।

अर्काे खेलमा पुलिसले आर्मीमाथि ३–२ को रोमाञ्चक र प्रतिस्पर्धात्मक जित निकालेको छ । सुरुवाती दुई सेटमा २५–१३, २५–२० को जित निकालेको पुलिसले त्यसपछिको दुवै सेट २३–२५, १४–२५ ले गुमाउँदा खेल पाँचौ सेटमा लम्बिएको थियो । निर्णायक सेटमा १५–१३ को प्रतिस्पर्धात्मक सेटमा जित निकाल्दै सेमिफाइनलमा पुग्न सफल भयो । पुलिसकी कमला पुन वुमन्स अफ दि म्याच घोषित भइन् ।

यस्तै अर्काे क्वाटरफाइनलमा घरेलु टोली गण्डकी प्रदेशले प्रदेश १ माथि २५–१०, २५–१० र २५–१७ को सोझो सेटमा जित निकाल्दै सेमिफाइनलमा पुग्न सफल भएको छ । यस खेलमा प्रदेश १ की पुर्णिमा राई वुमन्स अफ दि म्याच घोषित भइन् ।

अर्काे विभागीय टोदी एपिएफले सोमबारै लुम्बिनी प्रदेशमाथि २५–१५, २५–१८ र २५–१० को सोझो सेटमा हराएर सेमिफाइनलमा स्थान बनाइसकेको छ । एपीएफकी आरती सुवेदी वुमन्स अफ दि म्याच घोषित भइन् ।

यससँगै महिला भलिबलको सेमिफाइनल समिकरण पूरा भएको छ । अब सेमिपाइनलमा पुलिस र गण्डकी तथा एपिएफ र बागमतीबीच प्रतिस्पर्धा हुनेछ । सेमिफाइनल मंगलबार तथा फाइनल बुधबार हुनेछ ।