म्याग्दी (हाम्रो खेलकुद) – बागमती प्रदेश नवौ राष्ट्रिय खेलकुद प्रतियोगिता अन्तरगत महिला भलिबलमा समूह विजेता बनेर क्वाटरफाइनलमा प्रवेश गरेको छ ।

मधेश प्रदेशमाथि सोझो सेटमा जित निकाल्दै बागमती समूह ‘बी’ को विजेता बनेको हो । यो समूहबाट प्रदेश १ समूह उपविजेता बनेको छ । दुई हार बेहोरेको मधेश बाहिरिएको छ ।

म्याग्दीको बेनीस्थित खुल्लामञ्चको भलिबल कोर्टमा आइतबार भएको एकपक्षीय खेलमा बागमतीले २५–६, २५–८ र २५–७ को सहज जित निकाल्न सफल भयो । यस खेलमा जेनिशा विश्वकर्मा वुमन अफ दि म्याच घोषित भइन् ।

त्यसअघि आइतबारै विभागीय भिडन्तमा त्रिभुवन आर्मी क्लबको चुनौती ३–१ को सेटमा पन्छाउँदै नेपाल एपिएफ क्लब समूह ‘ए’ को विजेता तथा हारका बावजुत आर्मी पनि उपविजेताको रुपमा अघि बढेको छ । आर्मीमाथि एपिएफले २५–२०, १९–२५, २५–२१ र २५–२३ को सेटमा जित निकाल्न सफल भएको छ ।

यससँगै महिला भलिबलको क्वाटरफाइनल समिकरण पूरा भएको छ । क्वाटरफाइनलमा एपिएफ र लुम्बिनी, बागमती र सुदूरपश्चिम, नेपाल पुलिस र आर्मी तथा गण्डकी र प्रदेश १ बीच प्रतिस्पर्धा हुनेछ । चारै क्वाटरफाइनल सोमबार हुनेछ ।