म्याग्दी (हाम्रो खेलकुद) – विभागीय भिडन्तमा त्रिभुवन आर्मी क्लबको चुनौती पन्छाउँदै नेपाल एपिएफ क्लब नवौ राष्ट्रिय खेलकुद प्रतियोगिता अन्तरगत महिला भलिबलमा समूह विजेता बनेर क्वाटरफाइनलमा प्रवेश गरेको छ ।

एपिएफले आर्मीलाई ३–१ को सेटमा पराजित गर्दै समूह ‘ए’ को विजेता बनेर अन्तिम आठमा पुगेको हो । हारका बावजुत आर्मी पनि समूह उपविजेता बन्दै अघिल्लो चरणमा प्रवेश गरेको छ ।

म्याग्दीको बेनीस्थित खुल्लामञ्चको भलिबल कोर्टमा आइतबार भएको रोमाञ्चक र प्रतिस्पर्धात्मक खेलको पहिलो सेटमा २५–२० को जित निकाल्न सफल भयो । दोस्रो सेट आर्मीले २५–१९ ले जित्दै खेललाई बराबरीमा ल्याए ।

त्यसपछिको दुवै सेटमा एपिएफ विजयी हुन सफल भयो । तेस्रो सेट २५–२१ ले जितेको एपिएफले चौथो सेट २५–२३ ले जित्न सफल भयो । कर्णाली प्रदेश जित र अंकविहीन हुँदै बाहिरिएको छ ।

एपिएफले अब समूह सी को उपविजेता लुम्बिनी प्रदेशसँग तथा आर्मीले समूह सी को विजेता नेपाल पुलिस क्लबसँग खेल्नेछ ।

आइतबार बागमती र मधेशबीच प्रतिस्पर्धा हुँदैछ । यस खेलमा सफलता हात पारे बागमती समूह विजेता बन्नेछ भने प्रदेश १ उपविजेताको रुपमा अघि बढ्नेछ ।