गण्डकी, लुम्बिनी, आर्मी र एपीएफ सेमिफाइनलमा

पोखरा (हाम्रो खेलकुद) – नवौं राष्ट्रिय खेलकुद प्रतियोगिता अन्तर्गत पुरुष ह्याण्डबलमा गण्डकी, लुम्बिनी, आर्मी र एपीएफले अन्तिम चारमा स्थान बनाएको छ ।

समूह ‘ए’ बाट गण्डकी र विभागीय आर्मीले सेमिफाइनलमा स्थान बनाउँदा समूह बी बाट एपिएफ र लुम्बिनीले अन्तिम ४ मा स्थान बनाएका छन् । एपिएफ समूह विजेता र लुम्बिनी उपविजेताको रुपमा अघि बढेको हो ।

पोखरा रंगशालास्थित बहुउद्देश्यीय कभर्डहलमा बिहीबार भएको खेलमा समूह ए को अन्तिम खेलमा दुबैले २७÷२७ को बराबरी खेल्यो । बराबरी खेलेसँगै दुबैले समान १० अंक बटुलेको छ ।

निकै नै प्रतिस्पर्धात्मक खेलमा पहिलो हाफ १४–१४ गोलको बराबरीमा सकिएको थियो । खेलमा गण्डकीका दिनेश श्रेष्ठ, बासु गुरुङ तथा प्रेम गुुरुङले आर्मीका यामबहादुर पुनमगर र निर्मलबाबु श्रेष्ठले समान सर्वाधिक ६-६ गोल गरेका थिए ।

यता, महिलातर्फ समूह ए बाट एपीएफ र गण्डकी तथा समूह बी बाट विभागीय आर्मी र प्रदेश–१ ले सेमिफाइनलमा स्थान बनाएको छ । सेमिफाइनलमा एपीएफ र प्रदेश–१ तथा आर्मी र गण्डकीबीच खेल हुनेछ ।