फेन्सिङको महिला टिम फोयलमा एपिएफलाई स्वर्ण

पोखरा (हाम्रो खेलकुद) – नवौं राष्ट्रिय खेलकुद प्रतियोगिता अन्तर्गत बिहीबार फेन्सिङको महिला टिम फोयलमा सशस्त्र प्रहरी बल (एपिएफ) ले स्वर्ण पदक जितेको छ ।

एपिएफले बागमती प्रदेशलाई ४५–३६ अंकले पछि पार्दै स्वर्णपदक हात पारेको हो । फेन्सिङमा एपिएफको यो दोस्रो स्वर्ण हो । पोखरा रंगशालास्थित व्याडमिन्टन कोर्टमा भएको फाईनल प्रतिस्पर्धामा वागमतीले रजत पदक प्राप्त गर्दा गण्डकी प्रदेश र आर्मीले कास्य पदकमा चित्त बुझाए ।

फेन्सिङको पदक तालिकामा बागमती प्रदेश शीर्ष स्थानमा छ । बागमतीले ४ स्वर्ण, २ रजतसहित ६ पदक जितेको छ । त्यसैगरी आर्मीले ३ स्वर्ण, ५ रजत र ७ कास्य सहित १५ पदक प्राप्त गरेको छ ।

एपिएफ २ स्वर्ण, ३ रजत र ६ कास्य सहित ११ पदका साथ तेस्रो स्थानमा छ । सुदुरपश्चिम १ स्वर्ण, २ कास्यसहित ३ पदकसहित चौथो, प्रदेश १ ले ३ कास्यसहित पाँचौ र २ कास्य जितेको गण्डकी प्रदेश पदक तालिकाको पुछारमा छ ।