पोखरा (हाम्रो खेलकुद) – नवौं राष्ट्रिय खेलकुद प्रतियोगिता अन्तर्गत महिला ह्याण्डबलमा घरेलु गण्डकी र प्रदेश १ ले लगातार दोस्रो जित निकालेको छ ।

पोखरा रंगशालास्थित बहुउद्देश्यीय कभर्डहलमा मंगलबार भएको समूह ‘ए’ को खेलमा गण्डकीले सुदूरपश्चिम प्रदेशमाथि २७–४ को जित निकाल्दै लगातार दोस्रो जित निकालेको हो । गण्डकीकी योगिता गुरुङले सर्वाधिक ८ गोल गरिन् ।

गण्डकीले पहिलो खेलमा कर्णालीलाई ५८–२० को फराकिलो अन्तरले हराएको थियो । लगातार दोस्रो जितसँगै गण्डकीको २ खेलबाट ६ अंक पुगेको छ ।

यस्तै प्रदेश–१ ले लगातार दोस्रो जित निकाल्ने क्रममा बागमती प्रदेशलाई २४–८ ले पराजित गरेको छ । प्रदेश–१ की प्रेक्षा कटुवालले सर्वाधिक ८ गोल गरिन् । प्रदेश १ ले पहिलो खेलमा कर्णालीलाई २६–४ ले हराएको थियो । लगातार दोस्रो जितसँगै प्रदेश १ ले समूह ‘बी’ मा २ खेलबाट ६ अंक जोडेको छ ।

समूह ‘बी’ को खेलमा कर्णालीले मधेशमाथि ११–७ ले जित निकालेको छ । कर्णालीको जितमा अञ्जली शाही र संगीता सिंहले समान ५ गोल गरिन् । कर्णालीको यो पहिलो जित हो । यसअघि कर्णाली पहिलो खेलमा प्रदेश–१ सँग २६–४ ले पराजित भएको थियो ।

मधेशको यो लगातार दोस्रो हार हो । यसअघि मधेश आर्मीसँग ४६–२ ले पराजित भएको थियो । जितसँगै कर्णालीले महत्वपूर्ण ३ अंक बटुलेको छ ।

पुरुषतर्फ बागमती प्रदेशले मधेश प्रदेशमाथि २१–१३ को जित निकालेको छ । बागमतीका लागि सोनाम राकेश शेर्पाले सर्वाधिक ५ गोल गरे । बागमती पहिलो खेलमा आर्मीसँग ४३–८ ले पराजित भएको थियो । दुई खेलमा हार बेहोर्दै मधेश अंकविहीन छ ।