पोखरा (हाम्रो खेलकुद) – नवौं राष्ट्रिय खेलकुद प्रतियोगिता अन्तर्गत फेन्सिङमा मंगलबार तीन स्वर्णको छिनोफानो भएको छ ।

मंगलबार विभागीय नेपाल एपिएफका राजेन्द्र गजुरेलले व्यक्तिगत सावर, महिलातर्फ फोयलमा आर्मीकी रमा कुमारी सिंह र पुरुषतर्फको इपिमा बागमती प्रदेशका ओमकार सिंहले स्वर्णपदक जितेका छन् । एपिएफका गजुरेलले एपिएफका लागि पहिलो स्वर्ण जितेका हन् ।

पोखरा रंगशालास्थित व्याडमिन्टन कोर्टमा मंगलबार भएको प्रतिस्पर्धामा पुरुष व्यक्तिगत साबरतर्फ एपिएफका राजेन्द्रले आर्मीका उपेन्द्रबहादुर शाहीलाई १५–१२ अंकदे पछि पार्दै स्वर्ण जितेका हुन् ।

राजेन्द्रले सातौंमा टिम इभेन्टमा रजत र आठौंमा टिम र एकल दुईमा रजत पदक जितेका थिए । आर्मीकै रघुवीर चन्द र एपिएफका खेमराज खत्रीले कास्य पदकमा चित्त बुझाए ।

महिलातर्फको फोयलमा आर्मीकी रमाकुमारी सिंहले एपिएफकी मनिषा राईलाई १५–१४ को झिनो अंकले पछि पार्दै स्वर्ण जितिन् । एपिएफकै मन्दिरा र अनिता अधिकारीले कास्यपदक जितिन् । रमाले सातौंमा स्वर्ण तथा आठौंमा रजतपदक जितेकी थिइन् ।

पुरुष ईपीतर्फको प्रतिस्पर्धामा बागमती प्रदेशका ओमकार सिंहले विभागीय खेलाडीलाई पछि पार्दै स्वर्णपदक जित्न सफल भए । उनले आठौंमा पनि स्वर्ण जितेका थिए ।

आर्मीका राम थापा १५–१४ ले पछि पर्दै रजत पदकमा चित्त बुझाए । आर्मीकै मीन कार्की र गण्डकी प्रदेशका विजय अधिकारीले कास्य पदक जिते । विजय नवौं राष्ट्रिय खेलकुद प्रतियोगितामा गण्डकी प्रदेशबाट पदक जित्ने पहिलो खेलाडी बने ।

यससँगै फेन्सिङमा ६ स्वर्ण, ६ रजत र १२ कास्यको छिनोफानो भएको छ । अंक तालिका अनुसार आर्मी शीर्षस्थानमा छ । आर्मीले २ स्वर्ण, २ रजत र ६ कास्यसहित १० पदक प्राप्त गरेको छ । बागमतीले २ स्वर्ण, १ रजतसहित ३ पदक प्राप्त गरेको छ ।

एपिएफले १ स्वर्ण, १ रजत र ५ कास्यसहित ७ पदकसहित तेस्रो स्थानमा छ । सुदुरपश्चिम प्रदेश १ स्वर्णपदक सहित चौथो स्थान छ । त्यसै गरी गण्डकी प्रदेश १ कास्यसहित पाचौं स्थानमा रहेको छ । प्रदेश नम्बर एकले पदक जित्न सकेको छैन ।

विजयी खेलाडीलाई राष्ट्रिय खेलकुद परिषदका सदस्य सचिब टंकलाल घिसिङलगायतले पदक वितरण गरे ।