काठमाडौं (हाम्रो खेलकुद) – महिला राष्ट्रिय भलिबल टोलीकी सदस्य प्रतिभा माली र लिबेरो सलिना श्रेष्ठलाई समेट्दै नवौं राष्ट्रिय खेलकुद प्रतियोगिताको लागि बागमती प्रदेशको महिलातर्फको भलिबल टोलीको घोषणा भएको छ ।

माधव केसी संयोजक रहेको तीन सदस्यीय छनोट समितिले नवौंको लागि १२ सदस्यीय टोली घोषणा गरेको हो । छनोट समितिको सदस्यमा प्रशिक्षक कुमार राई र उत्सव खड्का रहेका छन् । टोलीको कप्तानी ललिता नाथले गर्नेछिन् ।

ओपन स्पाइकरमा प्रतिभा माली, सलिना बुढा मगर, जेनिशा विश्वकर्मा र चाहना ब्लोन तामाङ रहेका छन् । मिडल ब्लकरमा कप्तान ललिता नाथ, वालमिका आचार्य र सुनिता गौतम तथा सेटरमा प्रगति नाथ र भावना तामाङ छनोट हुन सफल भएकी छन् । ब्याकमा निशा महर र प्रेम मायाँ तामाङ तथा लिवेरोमा सलिना श्रेष्ठ छनोट भएका छन् ।

प्रतिभाले गत वर्ष नेपालगन्जमा भएको प्रधानमन्त्री कपपछि खेलेकी छैनन् । आफ्नो पूरानो चोट बल्झिएपछि प्रतिभा यो अवधिमा फिजियोथेरापीमा व्यस्त रहिन् । अब उनले नवौं राष्ट्रिय खेलकुदबाट नै खेलमा पूनरागमन गर्ने प्रशिक्षक कुमार राईले जानकारी गराए ।

बागमतीको प्रशिक्षकमा कुमार राई तथा टिम व्यवस्थापकमा सुनकेशरी माली रहनेछिन् । नवौं राष्ट्रिय खेलकुद अन्तरगत महिला भलिबलतर्फको खेलहरु २७ असोजदेखि २ कार्तिकसम्म म्याग्दीको बेनीमा हुदैछ । प्रतियोगितामा तीन विभागीय टोली र ७ प्रदेश गरी १० टोलीको सहभागिता रहेको छ । खेल तालिका सार्वजनिक भइसकेको छैन । पुरुषतर्फको खेलहरु पोखरामा असोज २८ देखि ३ कार्तिकसम्म हुँदैछ ।