काठमाडौं (हाम्रो खेलकुद) – दोस्रो संस्करणको नेपाल एपीएम अन्तर्राष्ट्रिय भेट्रान्स टेबल टेनिस प्रतियोगितालाई सिओम नेपालले मुख्य प्रायोजन गरेको छ ।

बुधबार सम्झौतामा हस्ताक्षर भएको छ । सम्झौतामा एपिएमका निर्देशक दान बहादुर महता र सिओम नेपालका प्रवन्ध निर्देशक ज्याकी महर्जनले हस्ताक्षर गर्दै आदान–प्रदान गरे ।

सम्झौता अनुसार सिओम नेपालले प्रतियोगिताको अनुमानित लागत रकमको ४०% (अक्षरुपी पाँच लाख रुपैंया) नेपाल एपीएमलाई प्रतियोगिता दौरान बुझाउने छ । प्रतियोगिताको अनुमानित रकम १२ लाख पचास हजार रुपैंया रहेको छ ।

प्रतियोगितामा अन्तर्राष्ट्रिय खेलाडीहरूले सहभागीता जनाउने छन् । यस प्रतियोगिताको पुरस्कार राशी ४ लाख ५० हजार रुपैयाँ रहेको छ ।

दोस्रो नेपाल एपीएम अन्तर्राष्ट्रिय भेट्रान्स टेबल टेनिस प्रतियोगिता अखिल नेपाल टेबल टेनिस संघको तत्वावधानमा वार्षिक कार्यक्रम अन्तर्गत हुन लागेको हो । प्रतियोगिता भैसेपाटीस्थित नेपाल एपीएम क्लबमा मंसिर १ देखि ३ गते सम्म आयोजना हुनेछ ।

प्रतियोगितामा मेन्स भेट्रान्स सिंगल्स (४० वर्षमाथि), मेन्स भेट्रान्स सिंगल्स (५० वर्षमाथि), मेन्स भेट्रान्स सिंगल्स ( ६० वर्षमाथि), वुमेन्स भेट्रान्स सिंगल्स (४० वर्षमाथि), र मेन्स भेट्रान्स टिम गरेर ५ स्पर्धामा खेलाडीहरूले प्रतिष्पर्धा गर्ने छन ।

५ स्पर्धाको बिजेता खेलाडीहरुलाई प्रथम, द्वितीय र तृतीय (दुवै सेमी–फाइनलिष्ट) हरूलाई क्रमशः ५० हजार, दोस्रो हुनेले २० हजार र तेस्रो हुने दुई टोलीले समान १० हजार रुपैया हात पार्नेछ ।