काठमाडौं (हाम्रो खेलकुद) – तमु युवा समाज सिद्धलेक –२ खिर्रे धादिङको आयोजनामा यसै महिना पुरुष भलिबल प्रतियोगिता तथा विविधि सांस्कृतिका कार्यक्रमसँगै मैत्रीपूणै महिला भलिबल प्रतियोगिता आयोजना हुने भएको छ ।

प्रतियोगिता असोज २१ देखि २३ गतेसम्म सिद्धलेकस्थित भलिबल कोर्टमा हुने जिल्ला भलिबल संघ धादिङका अध्यक्ष अमृत गुरुङले जानकारी गराए ।

प्रतियोगितामा सहभागिताका २० असोजसम्म समय तोकिएको छ । सहभागिताका लागि ५ हजार रुपैयाँ शुल्क तोकिएको छ । एक टोलीमा एकै गाउँपालिकाका ६ जना र बाँकी ३ जना खुल्ला रहनेछ । टोलीमा एक जना व्यवस्थापक रहनेछ ।

प्रतियोगिताको विजेताले १ लाख रुपैयाँसहित ट्रफी मेडल र प्रमाणपत्र प्राप्त गर्नेछन् । दोस्रो हुनेले ५० हजार र तेस्रो हुनेले ३० हजार रुपैयाँ हात पार्ने आयोजकले जनाएको छ ।

सर्वाेत्कृष्ट खेलाडीले मेडल प्राप्त गर्नेछ । व्यक्तिगत विधातर्फ उत्कृष्ट स्पाइकर, सेटर, ब्लकर र सर्भरले पनि मेडल पाउनेछ ।प्रतियोगिताको मुख्य प्रायोजकमा सिद्धलेक गाँउ पालिका रहेको छ ।

सह–प्रायोजकमा उग्रचन्डी युवा क्लब र सहयोगी संस्थाहरुमा जिल्ला खेलकुद विकास समिति धादिङ, जिल्ला भलिबल संघ धादिङ, सिंद्धलेक भलिबल संघ र जीवन ज्योति युवा क्लब रहेका छन् । राष्ट्रिय टोलीका सदस्य रहेका विभागीय त्रिभुवन आर्मी क्लबमा स्पाइकर सरन सामरी क्षेत्री यही सिद्धलेकबाट उत्पादित खेलाडी हुन् ।