काठमाडौं (हाम्रो खेलकुद) – उज्ज्वल तारा स्कुल काँडाघारीले विगत ६ वर्षदेखि सञ्चालन गर्दै आएको ‘उज्ज्वल तारा दशैं रन फर गुड हेल्थ दौड’का विजयीलाई यसपाली नगदसँगै पोखरामा सुविधासहितको पुरस्कार दिने घोषणा गरेको छ ।

हरेक वर्ष दशैंको घटस्थापना अघिको शनिबार आयोजना हुँदै आएको ‘उज्ज्वल तारा दशैं रन फर गुड हेल्थ ५ किलोमटिर दौड कागेश्वरी मनोहरा नगरपालिका ९ मा रहेको स्कुलबाट शुरु हुनेछ । ७ वटा विधा रहेको यो वर्षको दौड यही शनिबार हुँदैछ ।

संयोजक नेपाली सेनाका कर्णेल विष्णु कार्कीका अनुसार १८ वर्ष उमेरमाथि समूहको महिला र पुरुष खुल्ला विधातर्फका विजयीहरुलाई क्रमशः १० हजार, ७ हजार र ५ हजार रुपैयाँ नगदको साथै ट्रफि, पदक र प्रमाणपत्र पुरस्कार दिइनेछ ।

यसैगरि अभिभावक विधातर्फको दौडका विजयी महिला तथा पुरुषलाई पोखराको क्राउन हिमालय होटेलमा २ रात खाने बस्ने सुविधासहितको पुरस्कार व्यवस्था गरिएको छ । श्रीमान र श्रीमती विधातर्फ दौडमा विजयी हुनेलाई पोखराको ग्राण्डी होटलमा एकरात खाने बस्नेको साथै दुवै जनालाई आउन जाने दुईतर्फी हवाई टिकटको व्यवस्था गरिएको संयोजक कार्कीले बताए ।

यसैगरि ५५ वर्षमाथिको उमेर समूहका विजयी पुरुष धावक (२जना) लाई पोखराकै ग्राण्डी होटेलमा एकरात बस्नेखाने व्यवस्था तथा विजयी महिला धावक (२ जना) लाई पोखराकै सहारा होटेलमा २ रात खाने बस्ने सुविधासहितको पुरस्कार व्यवस्था गरिएको छ ।

दौडमा सहभागी हुने सबै प्रतियोगिहरुले सहभागिता वापतको जनही तीनसय रुपैयाँ जम्मा गर्नुपर्ने व्यवस्था छ । उनका अनुसार दौडमा सहभागी हुन हालसम्म २०० जनाले आफ्नो नाम लेखाईसकेका छन् ।

सहभागिता शुल्क वापत उठेको सबै रकम वरिष्ठ मुटुरोग विशेषज्ञ डा.भगवान कोइरालाले स्थापना गर्न लागेको गैरनाफामूलक वाल मुटुरोग अस्पताललाई हस्तान्तरण गरिने कार्यक्रम संयोजक कार्कीले बताए ।