काठमाडौं (हाम्रो खेलकुद) – उदियमान राष्ट्रिय नम्वर एक रशिला महर्जन र नविन श्रेष्ठले प्रथम चन्द्रागिरी राष्ट्रिय ब्याडमिन्टन प्रतियोगिताको उपाधि जितेका छन् ।

सेनाकी खेलाडी महर्जनले महिला एकलतर्फ पूर्व नम्वर एक भोजपुरकी नङ्शल देवी तामाङलाई २१–१४ र २१–१३ को सोझो सेटमा पराजित गर्दै उपाधि जितेकी हुन् ।

यस्तै सेनाकै नविनले नेपाल पुलिस क्लबका बिष्णु कटुवाललाई २१–९ र २१–१६ ले पराजित गर्दै उपाधि जित्न सफल भए । बिजेताले नगद ४० हजार र उपबिजेताले नगद २० हजारसहित मेडल, ट्रफी र प्रमाण पत्र प्राप्त गरे ।

महिलातर्फ एपिएफकी शोभा गौचन र सेनाकी प्राथना देउवा संयुक्त तेश्रो भए । पुरुषतर्फ पुलिसका सुनिल जोशी र कालिकाका सुदीप सेढाईले तेश्रो स्थानमा चित्त बुझाए । तेश्रो हुनेले नगद १०–१० हजार प्राप्त गरे ।

महांकाल ब्याडमिन्टन कभर्डहलको आयोजनामा भएको प्रतियोगिताको शीर्ष २० बाहेकका पुरुष एकलतर्फ महांकालका सुजन थापाले सेनाका हिमाल चन्दलाई २१–१७, ११–२१ र २१–१८ ले हराएर उपाधि जिते । उनले ३० हजार प्राप्त गरे । उपविजेता चन्दले १५ हजार प्राप्त गरे । सेनाका कविर केसी र पुलिसका हिरा राई तेस्रो भए । उनीहरुले समान १० हजार प्राप्त गरे ।

सोही विधाको महिला एकलतर्फ सुर्खेतकी शिष्ना श्रीपालीले सुर्खेतकै अग्रीमा भण्डारीलाई १३–२१, २१–१६ र २१–११ ले पराजित गर्दै उपाधि जितिन् । श्रीपालीले ३० हजार र भण्डारीले नगद १५ हजार प्राप्त गरिन् । पुलिसका निकिता लामा र रिना तामाङल तेस्रो हुँदै समान १० हजार प्राप्त गरे ।

शीर्ष २० बाहेक पुरुष युगलतर्फ सेनाका पविन लिनथेप र सुरोज महर्जनको जोडीलाई हराएर एपिएफका प्रनिश सिंह ठकुरी र महांकालका सुजन थापाको जोडी पहिलो भयो ।

बिजयी जोडीले ३० हजार र दोस्रो भएकोले १५ हजार प्राप्त गरे । युनिटि ब्याडमिन्टन एकेडेमीका निश्चल खत्री र श्रीजल पोखरेल तथा सेनाका हिमाल चन्द र सन्तोष पनेरुको जोडी संयुक्त रुपमा तेस्रो भए ।

लोकल पुरुष युगलतर्फ महांकालका आकाश जोशी र याविक श्रेष्ठको जोडी प्रमोद महर्जन र सुमन महर्जनको जोडी माथि हावी भयो । जोशी र श्रेष्ठको जोडीले महर्जन जोडीलाई २१–१६, २१–१७ ले पराजित गर्दै नगद ३० हजार सहित मेडल, ट्रफी र प्रमाण पत्र प्राप्त गरे । महर्जन जोडीले नगद १० हजार प्राप्त गरे ।

तेश्रो स्थान प्राप्त गरेका बिपिन शाह र अमृत थापा तथा रामशरण केसी र दिवाकर पाण्डेको जोडीले १० हजार प्राप्त गरे । बिजयी खेलाडीहरुलाई प्रमुख अतिथी बागमती प्रदेश सांसद रमा आले मगरले पुरस्कार वितरण गरेकी थिईन् ।