काठमाडौं (हाम्रो खेलकुद) – पिनाकल कलेजका अजित कुमार यादव र नेपाल पुलिस क्लबकी राजपुरा पछाई अखिल क्रान्तिकारीद्वारा आयोजन गरिएको काठमाडौं रोड रेसमा उपाधि जितेका छन् ।

५ किलोमिटको दौड अजितले १७ मिनेट ४५.३ सेकेन्डसहित पहिलो भए । पुलिसका सन्तोष विक्रम बिष्ट २० मिनेट ३५.७५ सेकेन्डसहित दोस्रो भए । यस्तै १८ मिनेट ६.१ सेकेन्डका साथ त्रिभुवन आर्मी क्लबका मोहन देव जोशी तेस्रो भए ।

महिलातर्फ राजपुराले २० मिनेट ३५.७५ सेकेन्डसहित पहिलो भए । २० मिनेट ५०.१५ सेकेन्डका साथ पुलिस क्लबकी राममाया बुढा दोस्रो र रेखा बिष्ट २१ मिनेट ३.३५ सेकेन्डका साथ तेश्रो भए ।

पहिलो भएको अजित र राजपुराले २५ हजार रुपैयाँ, मेडल, ट्रफी र प्रमाण पत्र प्राप्त गरे । दोस्रो भएको सन्तोष र राम मायाले २० हजार रुपैयाँ र तेस्रो भएको मोहन र रेखाले समान १५ हजार रुपैयाँ हात पारे ।

आठौं संविधान दिवसको अवसरमा नेकपा माओवादी केन्द्रको भातृ संगठन अखिल क्रान्तिकारीले आयोजना गरेको प्रतियोगिताको विजयी खेलाडीलाई क्रान्तिकारी प्रगतीशील कानुन ब्यवसायी संघका संयोजक, पूर्व महान्याधिवक्ता एवम् पूर्व अखिल क्रान्तिकारीका अध्यक्ष रमन कुमार श्रेष्ठ, नेपाल ओलम्पिक कमिटिका सचिव, अखिल नेपाल खेलकुद महासंघका उपाध्यक्ष एवं नेपाल ब्याडमिन्टन संघका अध्यक्ष रामजी बहादुर श्रेष्ठ, एथलेटिक्स संघका सचिव आर.के. बिष्ट र मुख्य प्रशिक्षक चन्द्र बहादुर गुरुङ्गले पुरस्कृत गरे ।

रोड रेसमा ३६५ पुरुष र ११२ जना महिला गरि कुल ४७७ जनाको सहभागिता रहेको थियो । रेस रङ्गशालाबाट सुरु गरि थापाथली, माईतीघर, बवरमहल, बिजुलीबजार पुल हुँदै एभरेष्ट होटलको अगाडीको डिभाईडर हुँदै पुन त्रिपुरेश्वर रंगशालामा आएर समापन भएको थियो ।