भलिबल खेलाडी जेनिशा र निशालाई दौडमा पदक

काठमाडौं (हाम्रो खेलकुद) – भलिबल खेलाडी जेनिशा विश्वकर्मा र निशा महरले माध्यमिक विद्यालयस्तरीय दौडमा पदक जितेका छन् ।

न्यु डायमन्ड युथ स्पोर्ट्स क्लबबाट राष्ट्रिय स्तरको भलिबल प्रतियोगिता खेल्ने जेनिशा विश्वकर्मा र निशा महरले स्यूचाटारमा शनिबार भएको ३ किमि गल्स दौडमा दोस्रो र तेस्रो स्थान हासिल गरेकी हुन् । यि दुवै नैकापमा रहेको न्यू डायमन्ड एकेडेमीमा अध्ययनरत छन् । यस विधामा विश्व निकेतन स्कुलकी सुनिता न्यौपाने पहिलो भइन् ।

ब्वाइजतर्फ कंकाली माविका मिसन बुढा पहिलो भए । कंकालीकै अनुज महत दोस्रो भए । रत्न राज्य स्कुलका दिवस खत्री तेस्रो भए ।

ब्वाइज र गल्स दुवैतर्फको विजेता मिसन र सुनिताले समान ५ हजार रुपैयाँ र प्रमाणपत्र हात पारे । दोस्रो भएका जेनिशा र अनुजले ३ हजार रुपैया तथा तेस्रो भएका दिवस र निशाले समान २ हजार रुपैयाँ र प्रमाणपत्र हात पारे ।

स्यूचाटार बचत तथा ऋण सहकारी संस्था लिमिटेडको १६औ वार्षिकोत्सवको अवसरमा आयोजना भएको दौडमा विभिन्न २४ स्कुलका ७१ जना दौडिएका थिए । ब्वाइजमा ४१ जना र गल्समा ३० जनाको सहभागिता रहेको आयोजकले जानकारी गराए ।