काठमाडौं (हाम्रो खेलकुद) – मध्यपुर थिमी नगरपालिका ७ भक्तपुर जिल्लाब्यापी अन्तर वडा ब्याडमिन्टन प्रतियोगिताको टिम च्याम्पियन बन्न सफल भएको छ ।

जिल्लाब्यापी वडा स्तरीय प्रतियोगितामा थिमी ७ ले एक स्वर्ण दुई रजत पदकका साथ टिम च्याम्पियन बन्न सफल भएको हो ।
यस्तै दोश्रो स्थानमा रहेको मध्यपुर थिमी ८ एक स्वण र एक कास्य पदक प्राप्त गर्न सफल भयो ।

बराबर एक स्वर्ण प्राप्त गरेका सूर्यविनायक नगरपालिका ८ र मध्यपुर थिमी नपा ४ संयुक्त तेश्रो स्थानमा रहे । अन्तर्राष्ट्रिय ब्याडमिन्टन विकास केन्द्रको आयोजना तथा भक्तपुर जिल्ला ब्याडमिन्टन संघको तत्वावधानमा भएको प्रतियोगितामा पुरुषतर्फ सूर्यविनायक नगरपालिकाका आयुष प्रजापती र महिलातर्फ मध्यपुर थिमी ४ की कृषा श्रेष्ठले उपाधी जिते ।

आयुषले सूर्यविनायक ३ का रमेश बस्नेतलाई २१–१३, १८–२१ र २१–१६ ले पराजित गरे । कृषाले मध्यपुर थिमी ७ की शर्मिला केसीलाई २१–१८, १७–२१ र २१–१२ ले पराजित गरिन् ।

पुरुष युगलतर्फ मध्यपुर ७ का भिम राज कार्की र साजन न्यौपानेको जोडीले उपाधि उचाले । यो जोडीले थिमी ७ कै अशोक अधिकारी र महेश कार्कीलाई २१–११ र २१–१० ले पराजित गरे । पुरुष युगल ४५ बर्ष माथि थिमी ८ का पूर्णहरि होना र प्रेम भक्त ज्यानाको जोडीले थिमी ३ का भिम गिरी र देन लामाको जोडीलाई २१–१६ र २१–१९ ले पराजित गर्दै उपाधि जिते ।

प्रतियोगिताका विजयी खेलाडीहरुलाई समाज सेवी एवं करातेका खेलाडी अष्ट कोवे, भक्तपुर जिल्ला खेलकुद विकास समितिका अध्यक्ष दीपक थापा, भक्तपुर जिल्ला ब्याडमिन्टन संघका अध्यक्ष राजेन्द्र प्रजापती लगायतले पुरस्कृत गरे ।

१२ लाखको लागत रहेको प्रतियोगिताको विजयी शिर्ष तीन स्थान प्राप्त गर्ने खेलाडीहरुले ट्रफी, मेडल र प्रमाण पत्रका साथ नगद २० हजार, १० हजार र ५ हजार प्राप्त गरे । २०० बढि खेलाडीको सहभागिता रहेको प्रतियोगिता दुवाकोट सिटी ब्याडमिन्टन सोसाईटी ब्याडमिन्टन हलमा भएको थियो ।