पोखरा (हाम्रो खेलकुद) – विभागीय भिडन्तमा त्रिभुवन आर्मी क्लबलाई पराजित गर्दै नेपाल पुलिस क्लब लामाचौर तीज महोत्सव–२०७९ अन्तर्गत लामाचौर कप महिला तथा पुरुष राष्ट्रिय भलिबल प्रतियोगिता अन्तरगत पुरुषतर्फको फाइनलमा प्रवेश गरेको छ ।

पुलिसले आर्मीलाई ३–१ को सेटमा पराजित गर्दै फाइनलमा गण्डकी प्रदेशसँगको भेट पक्का गरेको हो । गण्डकीले मंगलबारै एपिएफको चुनौती ३–२ ले पन्छाउँदै फाइनलमा प्रवेश गरेको थियो ।

लामाचौरस्थित इन्द्र राज्यलक्ष्मी माविको भलिबल कोर्टमा बुधबार भएको खेलमा सेमिफाइनलको पहिलो सेटमा पुलिस २६–२४ ले विजयी भयो । दोस्रो सेटमा २५–१९ को सहज जित हात पारेको पुलिसले तेस्रो सेट १८–२५ ले गुमाएपनि चौथो सेटमा २५–१९ को सोझो सेटमा जित निकाल्दै फाइनलमा पुग्न सफल भयो । पुलिसका रविन चन्द प्लेयर अफ दि म्याच घोषित भए ।

अब पुलिसले उपाधिका लागि बिहीबार गण्डकी प्रदेशसँग खेल्नेछ । बिहीबारै आर्मीले तेस्रो स्थानको लागि एपिएफसँग खेल्नेछ ।पुलिस र आर्मीबीचको खेल मंगलबारको लागि नै तय भएपनि पहिलो सेटमा आर्मीले २२–१९ को अग्रता लिइरहँदा वर्षा भएपछि खेल स्थगित भएको थियो ।

महिलातर्फ उपाधिका लागि आज (बुधबार) नेपाल पुलिस क्लब र न्यू डायमन्ड युथ स्पोर्ट्स क्लबबीच प्रतिस्पर्धा हुनेछ । त्यसअघि गण्डकी प्रदेश र त्रिभुवन आर्मी क्लबबीच प्रतिस्पर्धा हुँदैछ ।

नव आदर्श सामुदायिक विकास समाजको आयोजनामा भइरहेको प्रतियोगितामा महिलातर्फ चार र पुरुषतर्फ पाँच टिमको सहभागिता रहेको छ । महिलातर्फ एपिएफ अन्तिम समयमा सहभागी भएनन् ।

महिलातर्फ नेपाल प्रहरी, त्रिभुवन आर्मी क्लब, न्यू डायमण्ड युथ स्पोर्टस् क्लब र गण्डकी प्रदेशको टिमले भाग लिएका छन् । पुरुषतर्फ नेपाल प्रहरी, सशस्त्र प्रहरी बल, त्रिभुवन आर्मी क्लबसहित बुटवलको मणिमुकुन्द भलिबल क्लब र गण्डकी प्रदेशको टिम गरी ५ टिमको सहभागिता रहेको छ ।

दुवै विधातर्फको विजेताले समान १ लाख ५० हजार १ सय ११, उपविजेताले १ लाख १ सय ११ र तेस्रो हुनेले ५० हजार १ सय ११ रुपैयाँ प्राप्त गर्नेछ । सर्वोत्कृष्ट खेलाडीसहित विधागतरुपमा उत्कृष्टले पनि पुरस्कार प्राप्त गर्नेछ ।