निर्णायक खेलमा ज्ञानेन्द्रको अर्धशतक

एजेन्सी – नेपालका अनुभवी ओपनर ज्ञानेन्द्र मल्लले केन्यासँगको पाँचौं टि२० आई खेलमा अर्धशतक प्रहार गरेका छन् । नैरोबीमा रहेको जिमखाना क्लब ग्राउन्डमा टस जितेर पहिला ब्याटिङ थालेको नेपालले १४ ओभरमा २ विकेट गुमाई १ सय १९ रन बनाएको छ ।

नेपालका ज्ञानेन्द्र मल्ल ४२ बलमा ५ चौका र १ छक्कासहित ५३ रनमा अविजित छन् । ज्ञानेन्द्रले ४१ बलमा आफ्नो टि२० आई करिअरको दोस्रो अर्धशतक प्रहार गरे ।

अर्जुन साउद २१ बलमा ४ चौका र १ छक्कासहित २९ रनमा आउट भए । पहिलो विकेटका लागि अर्जुन साउद र ज्ञानेन्द्र मल्लले ८ ओभरमा ६५ रनको साझेदारी गर्दै राम्रो सुरुवात दिलाएका थिए ।

अर्जुन शेम न्गोचेको आठौं ओभरको अन्तिम बलमा विकेटकिपर इफरान करिमबाट स्टम्पिङ आउट भए । नियमित ओपनर पवन सरार्फको स्थानमा नेपालले आज ज्ञानेन्द्रलाई ओपनिङ गराएको थियो ।

तेस्रो नम्बरमा आएका दीपेन्द्रसिंह ऐरी १७ बलमा ३ चौकासहित २२ रनमा आउट भए । क्रिजमा रोहित पौडेल छन् । पाँच टि२० आई खेलको सिरिज २(२ को बराबरी अवस्थामा छ ।