पोखरा (हाम्रो खेलकुद) – चारपटकको च्याम्पियन न्यू डायमन्ड युथ स्पोर्ट्स क्लब पोखराको लामाचौरमा जारी लामाचौर कप महिला तथा पुरुष राष्ट्रिय भलिबल प्रतियोगिता अन्तरगत महिलातर्फ फाइनलमा प्रवेश गरेको छ ।

लामाचौरस्थित इन्द्र राज्यलक्ष्मी माविको भलिबल कोर्टमा मंगलबार भएको खेलमा दोस्रो सेमिफाइनलमा गण्डकी प्रदेशलाई ३–० को सोझो सेटमा पराजित गर्दै फाइनलमा स्थान पक्का गरेको हो ।

युवा खेलाडीको बाहुल्यता रहेको न्यू डायमन्डले पहिलो सेट २५–१८ ले आफ्नो पक्षमा पारेको थियो । प्रतिस्पर्धात्मक र रोमाञ्चक बनेको दोस्रो सेट आफ्नो पक्षमा पार्न डायमन्डले निकै संघर्ष गर्नुपरेको थियो । प्रतिस्पर्धात्मक दोस्रो सेट डायमन्डले २६–२४ ले जित्न सफल भयो ।

तेस्रो सेट २५–११ ले सहज आफ्नो पक्षमा पार्दै फाइनलमा पुग्न सफल भयो । डायमन्डकी रिमा कुँवर खेलको वुमन अफ दि म्याच घोषित भए । डायमन्ड लगातार आठौंपटक यस प्रतियोगिताको फाइनलमा प्रवेश गरेको हो । यसअघि डायमन्डले चारपटक उपाधि जित्दा पछिल्लो तीन संस्करणमा भने उपविजेतामा सीमित बन्न पुगेको छ ।

अब डायमन्डले उपाधिका लागि बुधबार साविकको विजेता नेपाल पुलिस क्लबको सामना गर्नेछ । पुलिसले मंगलबारै अर्काे विभागीय टोली त्रिभुवन आर्मी क्लबलाई २६–२८, २७–२५, २५–११ र २६–२४ ले पराजित गर्दै फाइनलमा प्रवेश गरिसकेको छ ।

पुरुषतर्फ सेमिफाइनलमा मंगलबारै गण्डकी र एपिएफ तथा पुलिस र आर्मीबीच प्रतिस्पर्धा हुनेछ । फाइनल बुधबार हुनेछ ।
नव आदर्श सामुदायिक विकास समाजको आयोजनामा भइरहेको प्रतियोगितामा महिलातर्फ चार र पुरुषतर्फ पाँच टिमको सहभागिता रहेको छ । महिलातर्फ एपिएफ अन्तिम समयमा सहभागी नभएको आयोजकले जनाएको छ ।

महिलातर्फ नेपाल प्रहरी, त्रिभुवन आर्मी क्लब, न्यू डायमण्ड युथ स्पोर्टस् क्लब र गण्डकी प्रदेशको टिमले भाग लिएका छन् । पुरुषतर्फ नेपाल प्रहरी, सशस्त्र प्रहरी बल, त्रिभुवन आर्मी क्लबसहित बुटवलको मणिमुकुन्द भलिबल क्लब र गण्डकी प्रदेशको टिम गरी ५ टिमको सहभागिता रहेको छ ।

दुवै विधातर्फको विजेताले समान १ लाख ५० हजार १ सय ११, उपविजेताले १ लाख १ सय ११ र तेस्रो हुनेले ५० हजार १ सय ११ रुपैयाँ प्राप्त गर्नेछ । सर्वोत्कृष्ट खेलाडीसहित विधागतरुपमा उत्कृष्टले पनि पुरस्कार प्राप्त गर्नेछ ।