काठमाडौं (हाम्रो खेलकुद) – चुनदेवी युथ क्लबले प्रथम नमुना कप यू–१७ सेभेन ए साइड फुटबल प्रतियोगिताको उपाधि जितेको छ ।

गोदावारी नगरपालिका बसपार्कस्थित सेन्ट जेभियर स्कुलको खेल मैदानमा शनिबार भएको फाइनलमा वाइल्ड जुनियर फुटबल क्लबलाई टाइब्रेकरमा ३–२ ले पराजित गर्दै चुन देवीले उपाधि जितेको हो । निर्धारित समयको खेल गोलरहित बराबरीमा सकिएपछि खेलको निर्णय टाइब्रेकरबाट गरिएको थियो ।

उपाधिसँगै चुनदेवीले ट्रफी र प्रमाणपत्र हात पारे । दोस्रो भएको वाइल्ड जुनियर फुटबल क्लबले पनि ट्रफी र प्रमाणपत्र हात पारेको छ । चुनदेवीका मनिष पहरी उत्कृष्ट खेलाडी तथा उपविजेता वाइल्डका दिपेश श्रेष्ठ उत्कृष्ट गोलरक्षक घोषित भए । उनीहरु ट्रफीसँगै प्रमाणपत्र हात पारे ।

प्रतियोगिताको उद्घाटन सेन्ट जेभियर स्कुलका प्रिन्सिपल फादर विजय टोप्पोले रेफ्रीलाई बल हस्तान्तरण गर्दै गरेका थिए । विजयी टोली तथा खेलाडीलाई गोदावारी नगरपालिका वडा नम्वर ३ का अध्यक्ष सानु राज घिमिरे, गोदावारी प्रहरी बिट प्रमुख राम शरण न्यौपाने र क्लबका अध्यक्ष डम्मर बहादुर स्याङ्तानलगायतले पुरस्कृत गरे ।

नमुना युथ स्पोर्ट्स क्लबको आयोजनामा भएको एक दिने प्रतियोगितामा विभिन्न ११ टोलीको सहभागिता रहेको थियो । प्रतियोगिता नकआउटको आधारमा भएको थियो ।

क्लबका अध्यक्ष डम्मर बहादुर स्याङ्तानले युवा खेलाडी उत्पादन गर्ने लक्ष्यका साथ यू–१७ प्रतियोगिता आयोजना गरिएको बताए । नमुना युथ स्पोर्ट्स क्लबले प्रशिक्षणसँगै गाइजात्राको अवसरमा गाइजात्रा कप, महिला फुटबल र भेट्रान फुटबल प्रतियोगिता आयोजना गर्दै आइरहेको छ ।