काठमाडौं (हाम्रो खेलकुद) – छोर्तेन स्नुकर क्लबको आयोजनामा दोस्रो संस्करणको गोकर्णेश्वोर मेयर कप खुल्ला स्नुकर प्रतियोगिता यसै महिना आयोजना हुने भएको छ ।

आयोजकले बुधबार राजधानीमा पत्रकार सम्मेलनको आयोजना गर्दै दोस्रो संस्करणको प्रतियोगिता भदौं २५ गतेबाट हुने जानकारी गराएको हो । प्रतियोगितालाई नेपाल विलियडस, स्नुकर तथा पुल संघको प्राविधक सहयोग रहेको नेपाल बिलियर्ड, स्नुकर तथा पुल संघका अध्यक्ष सरोजकुमार मुल्मीले जानकारी गराए ।

यो प्रतियोगिता हालसम्मकै ठुलो धनराशिको हो । प्रतियोगितामा २५६ भन्दा बढी खेलाडीको सहभागिता रहने अपेक्षा गरिएको आयोजक क्लबका अध्यक्ष राजन लामाले जानकारी गराए ।

प्रतियोगिताको विजेताले २ लाख ५१ हजार रुपैयाँ, ट्रफी र मेडल हात पार्नेछ । दोस्रो हुनेले १ लाख ११ हजार रुपैयाँ, ट्रफी र मेडल प्राप्त गर्नेछ । तेस्रो हुने दुई खेलाडीले समान ५१ हजार रुपैयाँ, ट्रफी र मेडल प्राप्त गर्नेछ ।

यस्तै सेन्सर ब्रेक (१ सयभन्दा माथि) गर्नेले १ लाख १ हजार रुपैयाँ प्राप्त गर्ने आयोजकले जनाएको छ । हाइयस्ट ब्रेक (८० ब्रेकभन्दा माथि) ले २५ हजार रुपैयाँ प्राप्त गर्नेछ । उत्कृष्ट खेलाडीले १५ हजार, उदियमान र अनुशाषित खेलाडीले समान ११ हजार रुपैयाँ हात पार्नेछ ।

यस्तै क्वाटरफाइनलमा खेलेका ८ खेलाडीले पनि समान ११ हजार रुपैयाँ हात पार्नेछ। शीर्ष १६ खेलेकाले सिक्टिन बक्स प्राप्त गर्ने आयोजकले जनाएको छ ।