काठमाडौं (हाम्रो खेलकुद)– नेपाल तेक्वान्दो संघको आयोजनामा अर्को महिना तेस्रो माउन्ट एभरेष्ट अन्तर्राष्ट्रिय खुला तेक्वान्दो च्याम्पियनसिप विश्व वरियता जी २ तथा पहिलो माउन्ट एभेरेष्ट जिसिएस अन्तर्राष्ट्रिय खुला तेक्वान्दो पुम्से च्याम्पियनसिप हुने भएको छ ।

संघले मंगलबार पत्रकार सम्मेलन गर्दै असोज ६ देखि ९ गते सम्म गण्डकी प्रदेशको पोखरामा सञ्चालन हुने जानकारी दिएको छ । संघले दक्षिण एसियामै पहिलो पटक हुन यस्तो खाले वृहत प्रतियोगिता आयोजन गर्न लागेकोमा उत्साहित भएको जनाएको छ ।

संघले यसअघि सन् २०११ र २०१४ मा एभरेष्ट तेक्वान्दो च्याम्पियनसिप आयोजना गरेको थियो । त्यसपछि नेपालमा आयोजना भएको १३ औं दक्षिण एशियाली खेल र कोभिड १९ का कारण आयोजना गर्न नसकेको संघले जनाएको छ ।

पोखरामा आयोजना गरिने प्रतियोगितालाई विश्व तेक्वान्दो महासंघले स्विकृती दिइसकेको जनाएको छ । प्रतियोगितामा विश्वभरीका खेलाडीहरू, निर्णायक प्राविधिक तथा प्रशिक्षकहरु, सहभागी खेलाडीका परिवारका सदस्यहरू र विश्व तेक्वान्दो महासंघका अध्यक्षज्यू लगायत विशिष्ट पदाधिकारीहरूसहित २ हजार भन्दा बढीको सहभागीता रहने संघले अपेक्षा गरेको छ ।
आयोजक, स्वयंसेवक र प्राविधिकका मात्र झण्डै ३ सय रहेको उल्लेख गर्दै संघले प्रतियोगिता अवलोकन गर्न ५ हजार भन्दा बढी पोखरा पुग्ने अपेक्षा राखेको छ । पोखरा रंगशालास्थित बहुउद्धेश्यिय कभर्डहलमा आयोजना हुने प्रतियोगिताको पूर्व तयारी तथा व्यवस्थापनका लागि १ सय १ सदस्यीय मुल आयोज समिति र १६ वटा उपसमितिहरु गठन गरिएको जनाएको छ । प्रतियोगिताका लागि झण्डै २ करोड ५५ लाख खर्च हुने संघको अनुमान छ ।

नेपाल तेक्वान्दो संघका अध्यक्ष प्रकाश शम्सेर राणाले जी २ आयोजना मौका पाउनुलाई संघले ठूलो अवसरका रुपमा लिएको बताए । हाल सम्म ११ राष्ट्रका कुल ८ सय ११ जनाको सहभागिताका लागि दर्ता गरिसकेको गण्डकी प्रदेशको तेक्वान्दोका अध्यक्ष तथा आयोजक समितिका सचिव जगनबहादुर गुरुङले जानकारी दिए । प्राविधिक समितिका सदस्य समेत रहेका ओलम्पियन दीपक विष्टले यसअघिका दुई संस्करण सफलतापूर्वक सम्पन्न गरेकै कारण विश्व तेक्वान्दो महासंघले नेपाललाई जी २ प्रतियोगिता आयोजनाको मौका दिएको बताए ।