पोखरा (हाम्रो खेलकुद) – नवआदर्श सामुदायिक विकास समाज लामाचौरले हरितालिका तीजको अवसरमा आयोजना गर्ने लामाचौर कप महिला तथा पुरुष राष्ट्रिय भलिबल प्रतियोगिताको खेल तालिका सार्वजनिक भएको छ ।

आयोजकले सोमबार समूह विभाजन गर्दै महिला र पुरुष दुवैतर्फको खेल तालिका सार्वजनिक गरेको हो । सार्वजनिक भएको समूह विभाजनअनुसार महिलातर्फ समूह ‘ए’ मा नेपाल पुलिस, गण्डकी र एपिएफ तथा समूह ‘बी’ मा न्यू डायमन्ड युथ स्पोर्ट्स क्लब र त्रिभुवन आर्मी क्लब रहेका छन् । पुरुषतर्फ आर्मी र गण्डकी समूह ‘ए’ मा तथा पुलिस, एपिएफ र मणिमुकुन्द समूह ‘बी’ मा परेका छन् ।

सार्वजनिक भएको समूह विभाजन अनुसार महिलातर्फ न्यू डायमन्ड र आर्मी सेमिफाइनलमा प्रवेश गरिसकेका छन् । यि दुई टोलीबीचको एक खेलले नै समूह विजेताको छिनोफानो गर्नेछ । पुरुषतर्फ आर्मी र गण्डकी पनि सेमिफाइनलमा पुगेका छन् । यि दुई टोलीबीचको खेलले समूह विजेताको टुंगो लगाउनेछ ।

पहिलो दिन महिलातर्फ भदौं ११ मा पुलिस र गण्डकी तथा न्यू डायमन्ड र आर्मीबीच प्रतिस्पर्धा हुनेछ । पुरुषतर्फ पुलिस र मणिमुकुन्द तथा आर्मी र गण्डकीबीच प्रतिस्पर्धा हुनेछ । दोस्रो दिन महिलातर्फ पुलिस र एपिएफ तथा एपिएफ र गण्डकीबीच प्रतिस्पर्धा हुनेछ । पुरुषतर्फ एपिएफर मणिमुकुन्द तथा पुलिस र एपिएफबीच प्रतिस्पर्धा हुनेछ ।

समूह चरणपछि हरेक समूहका शीर्ष दुई टोली सेमिफाइनलम पुग्नेछन् । भदौं १३ मा सेमिफाइनल तथा भदौं १४ गते फाइनलसँग तेस्रो स्थानको लागि प्रतिस्पर्धा हुनेछ ।

यसपाली महिलातर्फ तीन विभागीय टोली नेपाल पुलिस, नेपाल एपिएफ क्लब, त्रिभुवन आर्मी क्लब, न्यू डायमण्ड युथ स्पोर्टर्स क्लब र गण्डकी प्रदेश गरी ५ टोली तथा पुरुषतर्फ पनि तीन विभागीय टिम नेपाल पुलिस, नेपाल एपिएफ क्लब, त्रिभुवन आर्मी क्लब, मणिमुकुन्द भलिबल क्लब र गण्डकी प्रदेश गरी ५ टोलीको सहभागिता रहेको छ ।

विगतमा महिला भलिबल र छात्र–छात्रा भलिबल हुँदै आएपनि यसपटक राष्ट्रिय पुरुष भलिबल थपिएको हो । प्रतियोगिता ११ देखि १४ भदौंसम्म लामाचौरमा रहेको इन्द्रराज्यलक्ष्मी माविको प्राङ्गणमा हुनेछ ।

दुवै विधातर्फको विजेताले समान १ लाख ५० हजार, उपविजेताले १ लाख र तेस्रो हुनेले ५० हजार प्राप्त गर्नेछ । सर्वोत्कृष्ट खेलाडीसहित विधागतरुपमा उत्कृष्टलाई आकर्षक पुरस्कार दिइनेछ ।

२४औं संस्करणको लामाचौर तीज महोत्सव–२०७९ मा महिला र पुरुष भलिबलसँगै अन्तरमावि लोक नृत्य, सितारियो कराते, अन्तरमहिला खुला तीज गीत प्रतियोगिता पनि हुनेछ ।

तीज गीतमा प्रथमले ५० हजार, दोस्रोले ३० हजार, तेस्रोले २० हजार र सान्त्वनाले १० हजार, अन्तरमावि लोकनृत्यतर्फ प्रथमले ४० हजार, दोस्रोले २५ हजार, तेस्रोले १५ हजार र सान्त्वना तीन टिम र उत्कृष्ट भेषभूषालाई ५ हजार दिइने छ ।