काठमाडौं (हाम्रो खेलकुद) – आयोजक टोली र प्याव्सन लमजुङ लमजुङ सदरमुकाम बेशीशहरमा जारी खुल्ला फुटसल प्रतियोगिता फाइनलमा प्रवेश गरेका छन् ।

आयोजक टिमले बैंकर ए टिमलाई ४–१ ले पराजित गर्दै फाइनलमा स्थान पक्का गरेको हो । आयोजक टिमका सुरेश श्रेष्ठ म्यान अफ दि म्याच घोषित भए ।

दोस्रो सेमिफाइनलमा बेसीशहर नगरपालिकालाई पेनाल्टी सुटआउटमा ३–२ ले पराजित गर्दै फाइनलमा स्थान बनाएके छ । निर्धारित समयमा २–२ गोलको बराबरीपछि खेल पेनाल्टीमा धकेलिएको थियो । फाइनल आइतबार हुनेछ ।

पहिलो हुने टिमलाई नगद १५ हजार र २५ हजार रुपैयाँको खसी, मेडल र प्रमाणपत्रको व्यवस्था गरिएको छ भने दोस्रो हुने टिमका लागि नगद १० हजार र २० हजार रुपैयाँ बराबरको खसी, मेडल र प्रमाणपत्र प्रदान गरिने भएको छ ।

उक्त प्रतियोगितामा एक लाख ३० हजार रुपैयाँ खर्च लाग्ने अनुमान गरिएको छ । कृष्णाष्टमीको अवसरमा हिमालयन ब्रदर्श ग्रुप र मनाङ मस्र्याङदी प्रालिले व्यापार व्यवसाय प्रवद्र्धन गर्ने र आपसी सदभाव बढाउने उद्देश्यले सञ्चालन गरिएको प्रतियोगितामा १४ टोलीको सहभागिता रहेको थियो ।

लिगका आधारमा खेलाइएको प्रतियोगितामा पहिलो दिन १८ खेल भएको थियो । दोस्रो दिन लिगका तीन, क्वाटर र सेमिफाइनलका खेल सकिएको छ ।