काठमाडौं (हाम्रो खेलकुद) – नेपाली वरिष्ठ अम्पायर उदय अर्याल जापानमा अर्काे सातादेखि आयोजना हुने विश्व ब्याडमिन्टन च्याम्पियनका लागि लाइन जजको भुमिका निर्वाह गर्न त्यसतर्फ प्रस्थान गरेका छन् ।

उनी बुधबार जापान प्रस्थान गरेका हुन् । उनलाई त्रिभुवन अन्तर्राष्ट्रिय विमानस्थलमा नेपाल ब्याडमिन्टन संघका उपाध्यक्ष सुभाष श्रेष्ठ र खेतान स्पोर्ट्स फाउण्डेशनका अध्यक्ष विकास खेतानले खादा लगाएर बिदाई गरे । यस्तै अर्याललाई नेपाल खेलकुद महासंघले पनि एक समारोहकाबीच बिदाई गरेको छ ।

जापानको राजधानी टोकियोमा अगष्ट २२ देखि २८ सम्म हुने टोटल इनर्जी वल्ड ब्याडमिन्टन च्याम्पियनसिप–२०२२ मा अर्यालले अन्तर्राष्ट्रिय लाइन जजको भूमिका निर्वाह गर्नेछ । विश्व ब्याडमिन्टन फेडेरेसन (बिडब्लुएफ) ले नेपालबाट अर्याललाई चयन गरेको हो ।

अम्पायर अर्यालले गत वर्ष जापानको टोकियोमै आयोजना भएको टोकियो पारालिम्पिक गेम्समा पनि लाइन जजको भुमिका निभाएका थिए । उनी पारालिम्पिकमा लाइन जज गर्ने पहिलो नेपाली ब्याडमिन्टन टेक्निकल अफिसियल हुन् ।

अम्पायर अर्यालसँग बिडब्लुएफले ४ वर्षसम्मको लागि अर्थात २०१९ जनवरीदेखि २०२२ को डिसेम्वरसम्मको लागि सर्टिफाइड अन्तर्राष्ट्रिय लाइन जजको मान्यता रहेको छ ।

अर्यालले विश्व ब्याडमिन्टन फेडेरेसन र ब्याडमिन्टन एसियाद्धारा मान्यता प्राप्त विश्वस्तरीय विभिन्न राष्ट्रिय तथा अन्तर्राष्ट्रिय प्रतियोगितामा सहभागिता जनाइसकेका छन् । मिल्स एरिया विराटनगर निवासी उनी नेपाल विद्युत प्राधिकरणमा कार्यरत छन् ।