काठमाडौं (हाम्रो खेलकुद) – गल्कोट भलिबल संघ, जिएम समाज नवलपुर, बुढानिलकण्ठ भलिबल क्लब कपन र जेनेक्स भलिबल टिम स्व. बिनय पन्त स्मृति कप पार्क पुरुष भलिबल प्रतियोगिताको सेमिफाइनलमा प्रवेश गरेका छन् ।

नयाँ बसपार्कस्थित ढोरपाटन स्पोर्ट्स क्लबको प्रशिक्षण केन्द्रमा बुधबार भएको क्वाटरफाइनलमा जिएम समाजले प्रदेश नम्वर १ लाई २–१ को सेटमा पराजित गर्दै अन्तिम चारमा स्थान बनाएको छ । पहिलो सेट २३–२५ ले गुमाएको जिएम समाजले त्यसपछिको दुवै सेट २५–१४ र १५–७ ले जित्न सफल भयो ।

अर्काे क्वाटरफाइनलमा बुढानिलकण्ठ कपनले निसिखोला बाग्लुङलाई २–१ को सेटमा हराउँदै सेमिफाइनलमा पुग्न सफल भयो । पहिलो सेट २३–२५ ले गुमाएको बुढानिलकण्ठले २५–१७ र १५–१० ले आफ्नो पक्षमा पार्न सफल भयो ।

यस्तै जेनेक्स भलिबल टिमले स्याङ्जा भलिबल टिमलाई २५–२३ र ३०–२८ को सेटमा पराजित गरेको छ । खेलको सुरुवातदेखि नै पछि परेको स्याङ्जाले दुवै सेटमा पूनरागमन प्रयास गरेपनि सफल हुन सकेन । यस्तै गल्कोट भलिल संघले मामा–भान्जा भलिबल टिमलाई समान २५–२३ र २५–२३ को सेटमा पराजित गरेको छ ।

अब सेमिफाइनलमा शनिबार जेनेक्स र गल्कोट तथा जिएम समाज र बुढानिलकण्ठबीच प्रतिस्पर्धा हुनेछ । फाइनल र तेस्रो स्थानको खेल पनि शनिबार नै हुनेछ । किङ्स क्लब काठमाडौंको आयोजनामा बिहीबारदेखि शुरु हुने प्रतियोगितामा २४ टोलीलाई दुई समूहमा विभाजन गरी नकआउटको आधारमा प्रतिस्पर्धा भएको छ ।

प्रतियोगिताको विजेताले ५० हजार रुपैयाँ, कप मेडल र प्रमाणपत्र हात पार्नेछ । दोस्रो हुनेले ३० हजार, तेस्रो हुनेले २० हजार र सान्त्वना हुनेले १० हजार रुपैयाँ, कप मेडल र प्रमणपत्र हात पार्नेछ । प्रतियोगिताको सर्वाेत्कृष्ट खेलाडीले दुई हजार रुपैयाँ हात पार्नेछ । व्यक्तिगत विधाका उत्कृष्ट सेटर, सर्भर, स्पाइकर, ब्लकर र प्रशिक्षकले जनही १ हजार रुपैयाँ र प्रमाणपत्र हात पार्नेछन् ।

गोरखा जिल्ला गोरखा नगरपालिका १२ का स्थायी बासी भलिबल प्रेमी तथा भलिबल खेलाडीलाई अत्यन्तै माया गर्ने विनयको गत वर्षको २६ असोजमा घान्द्रुक घुम्न जाने क्रममा दुर्घटनामा परी निधन भएको थियो । उक्त दुर्घटनामा उनीसहित ८ जनाको मृत्यु भएको थियो । उनी सारांगे छहारी भलिबल प्रतियोगिताको सदस्य रहेका थिए ।