काठमाडौं (हाम्रो खेलकुद) – अरहान्त केशर सिहं र अमृत थापामगर चौथो संस्करणको धनलक्ष्मी स्मृति राष्ट्रिय स्क्वास प्रतियोगिता अन्तरगत पुरुष खुल्लातर्फको फाइनलमा प्रवेश गरेका छन् ।

सातदोबाटोस्थित स्क्वास कोर्टमा शुक्रबार भएको सेमिफाइनलमा अरहान्तले अमिर ब्लोनलाई ११–५, ११–२ र ११–६ को सोझो सेटमा पराजित गर्दै फाइनलमा पुग्न सफल भयो ।

यस्तै अमृतले दीपक थापामाथि ११–२, ११–४ र ११–६ को सेटमा पराजित गर्दै फाइनलमा भेट पक्का ग¥यो । यि दुईले गत महिना ओलम्पिक दिवस अन्तरगतको राष्ट्रिय च्याम्पियनसिपको फाइनलमा प्रतिस्पर्धा गर्दा अरहान्तले उपाधि जितेको थियो ।

महिला एकलतर्फ पनि ओलम्पिक दिवस अन्तरगतको राष्ट्रिय च्याम्पियनसिपको फाइनलमा प्रतिस्पर्धा गरेका कृष्णा थापा र विपना ब्लोनबीच उपाधिका लागि प्रतिस्पर्धा हुने भएको छ ।

विपनाले स्वस्थानी श्रेष्ठमाथि ३–० को सोझो सेटमा पराजित गर्दै फाइनलको यात्रा तय गरिन् । सबै तीन सेटमा पछि परेको विपनाले पूनरागमन गर्दै सबै सेटमा ११–९, ११–९ र १३–११ को सेटमा जित निकाल्न सफल भएको थियो ।
यस्तै कृष्णाले भावना सुनुवारमाथि कृष्णा ११–८, ११–४ र ११–४ को सोझो सेटमा जित निकाल्दै फाइनलमा विपनासँगको भेट पक्का गरिन् ।

जुनियर ब्वाइज ओपनमा विकास मगरले पासाङ लामालाई ३–१ को सेटमा तथा गोपाल थापाले सलिम थापालाई ३–० को सोझो सेटमा हराउँदै फाइनलमा पुग्न सफल भयो ।

मास्टर्स ५० वर्षमाथि प्रज्वल प्रकाश प्रधानले धिर पुनलाई ३–१ को सेटमा तथा सुदिव सिंहले दिलिप अधिकारीलाई ३–० को सेटमा हराएर फाइनलमा स्थान बनाएको छ । राज महर्जन र प्रयाग जोशी प्लेट च्याम्पियनसिपको फाइनलमा प्रवेश गरिसकेका छन् ।

सबै ५ विधाको फाइनल खेल शनिबार बिहानबाट शुरु हुने आयोजक नेपाल स्क्वास ¥याकेट्स संघले जनाएको छ । संघका अध्यक्ष किशोर महर्जनकी आमा स्वर्गीय धनलक्ष्मी महर्जनको सम्झनामा भएको प्रतियोगितामा पुरुष खुल्ला, महिला खुल्ला, मास्टर खुल्ला पुरुष ५० वर्षभन्दा माथि, जुनियर ब्वाइज ओपन र प्लेट गरी ५ विधा समावेश गरिएको छ ।

पुरुष एकलको विजेताले शिल्डसँगै २५ हजार, दोस्रो हुनेले १५ हजार र तेस्रो हुने दुई जनाले समान १० हजार रुपैयाँ हात पार्नेछन् । महिला एकलको विजेताले शिल्डसँगै २० हजार, दोस्रोले १० हजार र तेस्रो हुने दुई जनाले समान ५ हजार हात पार्नेछन् । ब्वाइजको विजेताले १० हजार प्राप्त गर्नेछन् ।

जुनियरलाई प्रोत्साहनको लागि हरेक खेल जितेबापत् थप ५ सय थपिने संघका अध्यक्ष महर्जनले जानकारी गराए । यस्तै जुनियरतर्फका उत्कृष्ट खेलाडीहरुलाई संघबाट विशेष तालिम प्रदान गरिनेछ । मास्टर खुल्ला पुरुष ५० वर्षभन्दा माथि र प्लेट च्याम्पियनसिपको विजेताले ट्रफी पाउनेछन् ।