काठमाडौं (हाम्रो खेलकुद) – स्व. बिनय पन्त स्मृति कप पार्क पुरुष भलिबल प्रतियोगिताको तयारी पूरा भएको छ । आयोजक किङ्स क्लब काठमाडौंले बिहीबारदेखि शुरु हुने प्रतियोगिताको सम्पूर्ण तयारी पूरा भएको जनाएको छ ।

साउन १९ देखि २१ ग्तेसम्म हुने प्रतियोगिताको आयोजकले बुधबार खेल तालिका सार्वजनिक गरेको छ । नयाँ बसपार्कस्थित ढोरपाटन स्पोर्ट्स क्लबको प्रशिक्षण केन्द्रमा नकआउटको आधारमा हुने प्रतियोगितामा २४ टोलीको सहभागिता रहेको छ । सहभागी टोलीलाई दुई समूहमा विभाजन गरिएको छ ।

प्रतियोगितामा एक टोलीमा राष्ट्रिय टोली तथा विभागीय टोलीको सेटमा खेलिसकेका १२ जनामध्येबाट एक जना मात्रै सामवेश गर्न पाइनेछ । एक टोलीमा पाँच खेलाडी र एक प्रशिक्षक रहनेछ । प्रतियोगितामा सहभागिताको लागि ४ हजार रुपैयाँ दर्ता शुल्क राखिएको छ ।

विजेताले ५० हजार रुपैयाँ, कप मेडल र प्रमाणपत्र हात पार्नेछ । दोस्रो हुनेले ३० हजार, तेस्रो हुनेले २० हजार र सान्त्वना हुनेले १० हजार रुपैयाँ, कप मेडल र प्रमणपत्र हात पार्नेछ । प्रतियोगिताको सर्वाेत्कृष्ट खेलाडीले दुई हजार रुपैयाँ हात पार्नेछ । व्यक्तिगत विधाका उत्कृष्ट सेटर, सर्भर, स्पाइकर, ब्लकर र प्रशिक्षकले जनही १ हजार रुपैयाँ र प्रमाणपत्र हात पार्नेछन् ।

गोरखा जिल्ला गोरखा नगरपालिका १२ का स्थायी बासी भलिबल प्रेमी तथा भलिबल खेलाडीलाई अत्यन्तै माया गर्ने विनयको गत वर्षको २६ असोजमा घान्द्रुक घुम्न जाने क्रममा दुर्घटनामा परी निधन भएको थियो । उक्त दुर्घटनामा उनीसहित ८ जनाको मृत्यु भएको थियो । उनी सारांगे छहारी भलिबल प्रतियोगिताको सदस्य रहेका थिए ।