काठमाडौं (हाम्रो खेलकुद) – अमृत थापा मगर र अमिर ब्लोनले चौथो संस्करणको धनलक्ष्मी स्मृति राष्ट्रिय राष्ट्रिय स्क्वास प्रतियोगिता अन्तरगत पुरुष खुल्लातर्फ विजयी सुरुवात गरेका छन् ।

सातदोबाटोस्थित स्क्वास कोर्टमा मंगलबार अमृतले राज श्रेष्ठलाई ११–१, ११–० र ११–४ को सोझो सेटमा पराजित गर्दै विजयी सुरुवात गरेको हो । यस्तै अमिर ब्लोनले विनायक श्रेष्ठलाई ११–३, ११–५ र ११–९ को सेटमा हराएको छ ।

पुरुष एकलमै दीपक थापाले रिसव चोरीवाललाई ३–२ को सेटमा तथा राजेन्द्र शाक्यले सुभासिस थपलियालाई ३–० को सोझो सेटमा पराजित गरेको छ । यस्तै उमित शाक्य, दिव्य बज्राचार्य र गोपाल थापाले आफ्ना प्रतिद्धन्द्धीलाई समान ३–० को सोझो सेटमा पराजित गर्दै अर्काे चरणमा प्रवेश गरेका छन् ।

मास्टर खुल्ला पुरुष ५० वर्षभन्दा माथि जितेन्द्र मान जोशी, विदुर धमला, इन्द्र कार्की, दिलिप अधिकारी, लाल बहादुर गुरुङ, धिर पुन, प्रज्वल प्रधान र सुदिप सिंहले सफलता हात पार्दा कुलेश थापाले वाकओभर तथा मनोज श्रेष्ठले रिटायर्ड हर्ड पाएका छन् ।

महिला एकलतर्फको एकमात्र खेलमा भावना सुनुवारले अस्मिता नगरकोटीलाई ११–५, ११–३ र ११–५ को सोझो सेटमा पराजित गर्दै विजयी सुरुवात गरेकी छिन् । नेपाल स्क्वास ¥याकेट्स संघको आयोजनामा सोमबारदेखि शुरु भएको प्रतियोगिता २१ साउनसम्म चल्नेछ ।

संघका अध्यक्ष किशोर महर्जनकी आमा स्वर्गीय धनलक्ष्मी महर्जनको सम्झनामा भएको प्रतियोगितामा पुरुष खुल्ला, महिला खुल्ला, मास्टर खुल्ला पुरुष ५० वर्षभन्दा माथि, जुनियर ब्वाइज ओपन र प्लेट गरी ५ विधा समावेश गरिएको छ ।

पुरुष एकलको विजेताले शिल्डसँगै २५ हजार, दोस्रो हुनेले १५ हजार र तेस्रो हुने दुई जनाले समान १० हजार रुपैयाँ हात पार्नेछन् । महिला एकलको विजेताले शिल्डसँगै २० हजार, दोस्रोले १० हजार र तेस्रो हुने दुई जनाले समान ५ हजार हात पार्नेछन् ।

ब्वाइजको विजेताले १० हजार प्राप्त गर्नेछन् । जुनियरलाई प्रोत्साहनको लागि हरेक खेल जितेबापत् थप ५ सय थपिने संघका अध्यक्ष महर्जनले जानकारी गराए । यस्तै जुनियरतर्फका उत्कृष्ट खेलाडीहरुलाई संघबाट विशेष तालिम प्रदान गरिनेछ । मास्टर खुल्ला पुरुष ५० वर्षभन्दा माथि र प्लेट च्याम्पियनसिपको विजेताले ट्रफी पाउनेछन् ।

संघका अध्यक्ष किशोर महर्जनकी आमा स्वर्गीय धनलक्ष्मी महर्जनको सम्झनामा यो प्रतियोगिताको नामाकरण गरिएको हो । संघका अध्यक्ष महर्जनले आमा धनलक्ष्मीको सम्झनामा गैर नाफामुलक धनलक्ष्मी महर्जन फाउन्डेसन स्थापना गरेको छ ।