काठमाडौं (हाम्रो खेलकुद) – चौथो संस्करणको धनलक्ष्मी स्मृति राष्ट्रिय राष्ट्रिय स्क्वास प्रतियोगिता अर्काे सातादेखि आयोजना हुने भएको छ ।

आयोजक नेपाल स्क्वास ¥याकेट्स संघले शुक्रबार राजधानीमा पत्रकार सम्मेलनको आयोजना गर्दै प्रतियोगिता साउन १६ देखि २१ गतेसम्म सातदोबाटोस्थित स्क्वास कोर्टमा हुनेछ ।

संघका अध्यक्ष किशोर महर्जनकी आमा स्वर्गीय धनलक्ष्मी महर्जनको सम्झनामा यो प्रतियोगिताको नामाकरण गरिएको हो । संघका अध्यक्ष महर्जनले आमा धनलक्ष्मीको सम्झनामा गैर नाफामुलक धनलक्ष्मी महर्जन फाउन्डेसन स्थापना गरेको छ ।

सोही फाउन्डेसनको प्रायोजनमा प्रतियोगिता हुन लागेको हो । संस्थाले खेलसँगै शिक्षा, स्वास्थ्य, ज्येष्ठ नागरिक कल्याण, दिगो बातावरण संरक्षण, महिला सशक्तीकरण र राहत जस्ता धेरै सामाजिक कार्यमा आफूलाई समर्पित गर्दै आएको छ ।

यस संस्करणमा पुरुष खुल्ला, महिला खुल्ला, मास्टर खुल्ला पुरुष ५० वर्षभन्दा माथि, जुनियर ब्वाइज ओपन र प्लेट गरी ५ विधा समावेश गरिएको छ ।

पुरुष एकलको विजेताले शिल्डसँगै २५ हजार, दोस्रो हुनेले १५ हजार र तेस्रो हुने दुई जनाले समान १० हजार रुपैयाँ हात पार्नेछन् । महिला एकलको विजेताले शिल्डसँगै २० हजार, दोस्रोले १० हजार र तेस्रो हुने दुई जनाले समान ५ हजार हात पार्नेछन् ।

ब्वाइजको विजेताले १० हजार प्राप्त गर्नेछन् । जुनियरलाई प्रोत्साहनको लागि हरेक खेल जितेबापत् थप ५ सय थपिने संघका अध्यक्ष महर्जनले जानकारी गराए । यस्तै जुनियर तर्फका उत्कृष्ट खेलाडीहरुलाई संघबाट विशेष तालिम प्रदान गरिनेछ । मास्टर खुल्ला पुरुष ५० वर्षभन्दा माथि र प्लेट च्याम्पियनसिपको विजेताले ट्रफी पाउनेछन् ।

प्रतियोगितामा १ सय भन्दा बढी खेलाडीहरुले सहभागिता जनाउने अआयोजकले अनुमान गरेको छ । पुरस्कारको लागि १ लाख ३५ हजार रुपैयाँ राखिएको छ ।

स्क्वासले दक्षिण एसियाली खेलकुदको हरेक संस्करणमा नेपाललाई पदक दिलाइरहेको छ । संघले हालैमात्र घरेलु स्क्वासको खेल स्तर उकास्न इटालीका क्वालिफाइड लेभल टु प्रशिक्षक रेन्जो एडोर्नालाई नियुक्त गर्दै एक महिना प्रशिक्षण दिएका थिए । विश्व स्तरीय प्रशिक्षक रेन्जोले नेपालका शीर्ष महिला स्क्वास्स खेलाडीहरुमध्ये महिला र पुरुषतर्फ पाँच पाँच खेलाडीलाई प्रशिक्षण दिएका थिए ।