काठमाडौं (हाम्रो खेलकुद) – नासिर याह्या हुसेनले १०औं एनएसए कप खुला तथा उमेर समूह पौडी प्रतियोगितामा थप ३ स्वर्ण जितेका छन् । योसँगै उनले यस प्रतियोगितामा ५ स्वर्ण हात पार्न सफल भएका छन् ।

नेपाल पौडी संघको आयोजनामा सातदोबाटोस्थित पौडी पोखरीमा भइरहेको प्रतियोगितामा नासिरले सोमबार २०० मिटर फ्रिस्टायल, १०० मिटर ब्रेष्ट स्ट्रोक र १०० मिटर बटरफ्लाईमा स्वर्ण जितेका हुन् ।

नासिरले २०० मिटर फ्रिस्टायलमा २ मिनेट ३.८० सेकेन्डका साथ स्वर्ण जिते । दोश्रो भएका ईरभिन श्रेष्ठले २ मिनेट ८.९४ सेकेन्डमा पुरा गरे । यस्तै तेश्रो स्थानमा रहेका तेन्जिन नामडोल रायन गुरुङले २ मिनेट ९.०३ सेकेन्ड समय खर्चिए ।

यस्तै १०० मिटर ब्रेष्ट स्ट्रोकमा नासिरले १ मिनेट १२.४५ सेकेन्डमा पुरा गर्दै स्वर्ण जिते । दोश्रो भएका विकास कुमालले १ मिनेट १२.६८ सेकेन्डमा दुरी पुरा गरे । तेश्रो भएका दिपांकर अवालेले १ मिनेट १४.६० सेकेन्डमा दुरी पुरा गरे ।

१०० मिटर बटरफ्लाईमा नासिरले ५९.६० सेकेन्डमा दुरी पुरा गर्दै स्वर्ण जिते । यस विधामा अनुभव सुब्बाले १ मिनेट ००.२५ सेकेन्डमा दुरी पुरा गर्दै रजत र अल्भिन महर्जनले १ मिनेट ५.२९ सेकेन्डका साथ कास्य पदक प्राप्त गरे ।

महिलातर्फ दुवाना लामाले २ स्वर्ण र एक रजत प्राप्त गरिन् । दुवानाले २०० मिटर फ्रिस्टायलमा २ मिनेट १८.०५ सेकेन्डमा दुरी पुरा गर्दै स्वर्ण जितिन् । निभा मास्केले २ मिनेट १९.१५ सेकेन्डमा दुरी पुरा गर्दै रजत र अनुशिया तण्डुकारले २ मिनेट २४.७० सेकेन्डसहित कास्य जितिन् ।

यस्तै दुवानाले १०० मिटर ब्रेष्टस्ट्रोकमा १ मिनेट १८.७७ सेकेन्डमा दुरी पुरा गर्दै स्वर्ण पाईन् । यस विधामा उपास्थी महर्जनले रजत प्राप्त गरिन् । उनले उक्त दुरी १ मिनेट २३.६३ सेकेन्डमा पुरा गरिन् । तेश्रो भएकी रोयल प्रजापतीले १ मिनेट २६.६७ सेकेन्डमा दुरी पुरा गरिन् ।

१०० मिटर बटरफ्लाईमा निभा मास्केसँग पछि पर्दै दुवानाले रजतमा सीमित बनिन् । निभाले १ मिनेट ९.५१ सेकेन्डमा साथ स्वर्ण, दुवानाले १ मिनेट १२.३८ सेकेन्डका साथ रजत र सियरा सुभांगी बजगाईले १ मिनेट २४.१५ सेकेन्डका साथ कास्य पाईन् । प्रतियोगिता बुधबारसम्म सञ्चालन हुनेछ ।