काठमाडौं (हाम्रो खेलकुद) – तमु समाज माल्टाले लक्जेमवर्ग एनआरएनद्धारा आयोजित खुल्ला भलिबल लिग प्रतियोगिताको उपाधि जितेको छ ।

लक्जेमवर्गमा भएको फाइनलमा तमु समाज माल्टाले पोर्चुगल एनआरएनलाई २–१ को सेटमा पराजित गर्दै उपाधि जितेको हो ।

तमु समाज माल्टाले च्याम्पियन बन्ने क्रममा समूह चरणमा स्पेन एनआरएन र लक्जेमवर्ग एनआरएनलाई २–० को सोझो सेटमा पराजित गरेको थियो । सेमिफाइनलमा फ्रान्स एनआरएनलाई पनि २–० को सोझो सेटमा पराजित गर्दै फाइनलमा पुग्न सफल भएको थियो ।

उपाधिसँगै तमु समाज माल्टाले २ हजार युरो, कप र मेडल प्राप्त गरेको छ । दोस्रो भएको पोर्चुगल एनआरएनले १ हजार युरो, कप र मेडल हात पारेको छ ।

तमु समाज माल्टाको प्रशिक्षकमा खुम गाँउले मगर टिम व्यवस्थापकमा पम बहादुर गुरुङ रहेका थिए । उनी राष्ट्रिय भलिबल रेफ्रीसमेत हुन् । तमु समाज माल्टाबाट सोवित राना मगर, विनोद गुरुङ र विशाल थापासँगै धिरज गुरुङ, देउ कुमार खेवाङ, मिलन श्रेष्ठ, गणेश राना र टम बहादुर केसीले खेलेका थिए ।

प्रतियोगितामा पोर्चुगल एनआरएन, डेनमार्क एनआरएन, स्पेन एनआरएन, फ्रान्स एनआरएन, बेल्जियम एनआरएन, तमु समाज माल्टा र आयोजक लक्जेमवर्ग एनआरएन गरी ७ टोलीको सहभागिता रहेको थियो ।

घरेलु भलिबलमा आफ्नो प्रभाव जमाएका खेलाडीहरु रोजगारीको शिलशिलामा विदेशमा रहेपनि निरन्तर भलिबल खेल्दै आएका छन् ।