सिंगापुरविरुद्ध जिम्बावेको रनको वर्षा

एजेन्सी – घरेलु टोली जिम्बावेले आइसिसी टि२० विश्वकप छनोट बी को पहिलो खेलमा सिंगापुरलाई २ सय ३७ रनको विशाल लक्ष्य दिएको छ ।

क्विन्स स्पोर्ट्स क्लबमा टस हारेर पहिला ब्याटिङ थालेको जिम्बावेले निर्धारित २० ओभरमा ५ विकेट गुमाउँदै २ सय ३६ रन बनायो । जिम्बावेका सिकन्दर राजाले ४० बलमा ८ चौका र ५ छक्कासहित सर्वाधिक ८७ रन बनाए ।

उनको टि२० आई करिअरको उच्च प्रदर्शन हो । सेन विलियम्स ३५ बलमा ५ चौका र १ छक्कासहित ५३ रनमा आउट भए । ओपनर रेजिस चकभा १२ बलमा ४ चौकासहित २४ रनमा आउट भए । कप्तान क्रेग एर्विनले १६ बलमा ५ चौका र २ छक्कासहित ३४ रन बनाए ।

जिम्बावेले टि२० आई मा बनाएको यो सर्वाधिक ठूलो योगफल हो । यसअघि जिम्बावेले २०१२ मा न्युजिल्यान्डविरुद्ध २ सय रन बनाएको थियो ।

त्यस्तै अर्को खेलमा जर्सीले अमेरिकालाई १ सय ५५ रनको लक्ष्य दिएको छ । जर्सीका आसा ट्रिबीले ४५ बलमा १ चौका र ७ छक्कासहित सर्वाधिक ७३ रन बनाए । प्रतियोगिता शीर्ष दुई टोली आगमी अक्टोबर नोभेम्बरमा अष्ट्रेलियामा हुने टि२० विश्वकप खेल्न पाउने छन् ।