काठमाडौं (हाम्रो खेलकुद) – राष्ट्रिय खेलकुद प्रतियोगितामा विजेता बन्ने टोलीले १० लाख रुपैयाँको आकर्षक ट्रफी प्राप्त गर्ने भएको छ ।

नवौं राष्ट्रिय खेलकुद प्रतियोगिता आयोजनाका लागि गठन गरिएको मुल आयोजक समितिको बैठकले प्रतियोगिताको विजेता टोलीलाई १० लाख रुपैयाँको आकर्षण ट्रफी प्रदान गर्ने निर्णय गरेको हो ।

राखेपले नवौं राष्ट्रिय खेलकुद प्रतियोगितादेखि नै लागु हुने गरी मुख्य ट्रफी निर्माण गर्नेछ । उक्त ट्रफीलाई विभागीय टिमसँगै सात वटै प्रदेशमा ओलम्पिक टर्च ¥यालीजस्तै टुर गराइनेछ । लगातार तीन संस्करणमा विजेता बन्ने टोलीलाई यो ट्रफी प्रदान गरिने राखेपले जनाएको छ ।

गण्डकी प्रदेशको ११ जिल्लामा आगामी असोज २८ गतेदेखि कार्तिक ३ गतेसम्म हुने नवौं राष्ट्रिय खेलकुदमा सात प्रदेश, तीन विभाग र गैर आवासिय नेपाली संघ (एनआरएनए) टिमसहित ११ टोलीका खेलाडीले विभिन्न ३६ खेलमा प्रतिस्पर्धा गर्नेछन् ।

सर्वाधिक स्वर्ण पदक विजेता टिम च्याम्पियन हुँदै आकर्षक ट्रफी उचाल्नेछ । दुई खेल प्रदर्शनी खेल हुनेछ । जसमा ठेलो र रग्वी सेभेन्स् रहेका छन् ।

यस्तै बैठकले प्रतियोगिता संचालनका लागि राखेपका सदस्य सचिव टंक लाल घिसिङको संयोजकत्वमा कार्यकारी समिती गठन गर्ने र प्रतियोगिताका लागि १४ वटा उपसमिति गठन गर्ने निर्णय गरेको छ ।