काठमाडौं (हाम्रो खेलकुद) – आयोजक राष्ट्रिय खेलकुद परिषद (राखेप) ले गण्डकी प्रदेशमा आयोजना हुने नवौं बृहत् राष्ट्रिय खेलकुद प्रतियोगिताको औपचारिक रुपमा तयारी शुरु भएको जनाएको छ ।

नवौं खेलकुदको मुल आयोजक कमिटीको शुक्रबार काठमाडौंमा बसेको बैठकले नवौंको तयारी औपचारिक रुपमा शुरु भएको जनाएको छ । नवौं राष्ट्रिय खेलकुद) असोज २८ देखि कार्तिक ३ गतेसम्म गण्डकी प्रदेशको सबै ११ जिल्लामा आयोजना हुँदैछ ।

नवौंका लागि मुल आयोजक कमिटीको बैठकले यसै साताभित्र काठमाडौं र पोखरामा सचिवालय खोल्ने निर्णय गरेको छ । नवौं राष्ट्रिय खेलकुद ६० करोड बजेट भित्र हुनेछ ।

यस्तै बैठकले नवौंका लागि प्रशिक्षण शुरु गर्न सबै खेल संघलाई निर्देशन दिएको छ । विभागीय टोलीलाई तयारीको लागि ९ लाख रुपैयाँ र अन्य टोलीलाई तयारीको लागि ४९ लाख रुपैयाँ छुट्याइएको छ । खेलाडीलाई दैनिक २ हजार भत्ता दिने निर्णय गरेको छ ।

युवा तथा खेलकुद मन्त्री महेश्वर जंग गहतराजले बैठकको उद्घाटन गर्दै मन्त्री गहतराजले कोभिड १९ का कारण निर्धारित मितिमै नवौं हुन नसकेको र अब रोकिनुपर्ने कुनै कारण नरहेको बताएका छन् । नवौं २०७७ मै आयोजना गर्नुपर्ने भएपनि कोभिडका कारण स्थगित भएको थियो ।

‘केही वर्ष ढिला भएको छ । नवौं गराउन गण्डकी प्रदेश सरकारको पनि दायित्व रहेको छ ।’ मन्त्री गहतराजले भने, ‘गण्डकी प्रदेशमा केही पूर्वधार बन्न बाँकी छ । त्यसलाई समयभित्र नै परिपुर्ति गर्नेछौं । सबैलाई आ–आफ्नो ठाउँबाट सहयोग गर्न आग्रह गर्दछु ।’

बैठकबाट कार्यकारी समिति र विभिन्न तयारी उपसमिति गठन गर्ने निर्णय गरेको छ । बैठकमा मन्त्री गहतराज, राष्ट्रिय खेलकुद परिषदका सदस्य सचिव टंकलाल घिसिङ, सातै प्रदेशका खेलकुद सदस्य सचिव, विभागीय टोली, राष्ट्रिय खेलकुदमा सहभागिता जनाउने खेल संघका प्रतिनिधिहरुको उपस्थिति रहेको छ ।

यसपटक नवौंमा ३६ प्रतिस्पर्धी खेलसँगै दुई प्रदर्शनी खेल पनि समावेश छ । नवौंमा गैर आवासिय नेपाली संघ (एनआरएन) सहित तीन विभागीय टोली र सात प्रदेश गरी ११ टोलीको सहभागिता रहेको छ