काठमाडौं (हाम्रो खेलकुद) – जैसिदेवल तेक्वान्दो डोजाङका खेलाडीद्वय मुविक्क्षा गजुरेल र रोजन प्रजापतिले भारतको आसाममा भएको ओपन कुकिओन डिस्प्याच अन्तर्राष्ट्रिय च्याम्पियनसिपमा दोहोर पदक जितेका छन् ।

आसाम तेक्वान्दो संघ तथा तितावोर डोजाङ तेक्वान्दो एकेडमीद्वारा भारतको आसाममा मिति २०२२ जुलाई १ देखि ३ सम्म भएको च्याम्पियनसिपमा मुविक्क्षाले सव जुनियर क्याटागोरीमा ग्योरोगीतर्फ स्वर्ण र पुम्सेतर्फ काँस्य तथा रोजनले क्याडेट क्याटागोरीमा ग्योरोगीतर्फ रजत र पुम्सेतर्फ काँस्य पदक जितेका हुन् ।

जैशिदेवल युथ क्लबद्वारा सञ्चालित जैशिदेवल तेक्वान्दो डोजाङका ११ खेलाडीहरुले प्रशिक्षक अन्जित राई, टिम व्यवस्थापक रमेश प्रजापति, अफिसयल भरत कारञ्जितको नेतृत्वमा नेपालको प्रतिनिधित्व गर्दै ग्योरोगीतर्फ मुविक्क्षा गजुरेल, आस्ना राना मगर र झरना थापा मगरले स्वर्ण पदक, रोजन प्रजापति, सोनी बानियाँ, राजीव गुरुङ र समर्थध्वज जोशीले रजत पदक, सन्देश राई, राहुल लिम्बु र समर लामाले काँस्य पदक साथै पुम्सेतर्फ सुरेश हाङ लिम्बु, रोजन प्रजापति र मुविक्क्षा गजुरेलले काँस्य गरि नेपालका लागि १३ पदक जित्न सफल भएका छन् ।

उक्त प्रतियोगितामा अन्तर्राष्ट्रिय प्रशिक्षक, ग्योरोगी-पुम्सेका अन्तर्राष्ट्रिय निर्णायक रविन मल्लले ग्राण्ड जुरीको भुमिका निर्वाह गरेका छन् ।

प्रतियोगितामा सहभागिताको लागि लागेको दुई लाख भन्दा बढी सम्पूर्ण रकम जैसिदेवल युथ क्लवले व्यहोरेको अन्तर्राष्ट्रिय प्रशिक्षक-अन्तर्राष्ट्रिय निर्णायक तथा क्लवका अध्यक्ष राजेश प्रजापतिले जानकारी दिएका छन्।

जैसिदेवल युथ क्लवले न्युनतम शुल्कमा तेक्वान्दो तालिम, निम्नवर्गिय खेलाडीहरुलाई निःशुल्क तालिम, निःशुल्क तेक्वान्दो पोसाक वितरण तथा शैक्षिक छात्रवृत्ति समेत प्रदान गर्दै आएको जानकारी क्लवका अध्यक्ष राजेश प्रजापतिले जनाएका छन् ।