विजय नेपाली, पोखरा

छैटौं पोखरा स्पोर्ट्स अवार्डमा लन टेनिसले ह्याट्रिक अवार्ड जितेको छ । ७ विधामा प्रदान गरिएको अवार्डमा टेनिसले ३ विधा प्राप्त गरेको हो ।

३ विधा प्राप्त गर्दै गर्दा टेनिसका प्रदिप खड्का वर्ष उत्कृष्ट पुरुष खेलाडी चुनिए । यस्तै भलिबलकी अरुणा शाही वर्ष उत्कृष्ट महिला खेलाडी चुनिइन् । टेनिसले वर्ष उत्कृष्ट खेलाडीसंगै उत्कृष्ट प्रशिक्षक र उदीयमान खेलाडीको अवार्ड समेत पाए ।

नेपाल खेलकुद पत्रकार मञ्च गण्डकीले आयोजना गरेको स्पोट्र्स अवार्ड २०७८ सालको खेल प्रदर्शनका आधारमा प्रदान गरिएको थियो । नेपाली राष्ट्रिय महिला सिनियर टोलीकी कप्तान समेत रहेकी अरुणाले क्रिकेटकी मणिषा उपाध्याय र कराँतेकी सरगम कुमाललाई पछि पार्दै इलेक्ट्रोनिक स्कुटर सहित अवार्ड प्राप्त गरेकी हुन ।

अरुणाले यश अघि पनि दोस्रो संस्करणको पोखरा स्पोर्ट्स अवार्ड समेत जितेकी थिइन् । उनको नेतृत्वमा नेपालले भलिबलमा दशकौ पछि पहिलो पटक अन्तरािष्ट्रय रुपमा स्वर्ण हासिल गरेको थियो । नेपालले सेन्ट्रोल जोन भलिबलको उपाधी उचालेको थियो । जुन नेपाली भलिबलको इतिहासमा स्वर्णिम क्षण थियो ।

यस्तै वर्ष उत्कृष्ट पुरुष खेलाडी टेनिसका प्रदिप खड्काले प्राप्त गरे । पाचौं संस्करणको उदियमान खेलाडी अवार्ड समेत प्राप्त गरेका प्रदिप टेनिसमा नेपालको १ नबर खेलाडी समेत हुन । उनले ब्याडमिन्टनका विधान अधिकारी र सितेरियो कराँतेका बुद्ध लामालाई पछि पार्दै अवार्ड जितेका हुन । उनले १३ औँ सागमा नेपाललाई पहिलो पटक टेनिसमा पदक दिलाएका थिए । यतिमात्रै होइन् सानै उमेरमा उनले २०७७÷२०७८ सालमा बंगलशादेशमा टेनिसको यु १९ को राष्ट्रिय प्रशिक्षक समेत भएका थिए ।

पोखरा स्पोर्ट्स अवार्ड वर्ष उत्कृष्ट खेल संघबाट तेक्वान्दो संघ सम्मानित भएको छ । संघलाई नगद ३५ हजार रुपैयाँ सहित अवार्ड प्रदान गरिएको हो । तेक्वान्दो प्रदेशमा मात्रै नभइ अन्तर्राष्ट्रिय स्तरमै सबैभन्दा बढी पदक जितेको थियो । नेपालमा समपन्न १३ औ सागमा समेत नेपालले सबैभन्दा बढी पदक प्राप्त गरेको थियो ।

यस्तै वर्ष उत्कृष्ट उदियमान खेलाडीको अवार्ड टेनिसका दर्शिल श्रेष्ठ सम्मानित भएका छन । उनले श्रीष्टी जैसी र बक्सिङका साहिल लिम्बुलाई पछि पार्दै अवार्ड जिते । वर्ष उत्कृष्ट प्रशिक्षक अवार्डबाट पनि टेनिसका निरज थापा सम्मानित भए ।

लाइफ टाइम एचिभमेन्ट अवार्डबाट गणेश भट्टराई सम्मानित भए । सम्मानित हुँदै थापाले नेपालको झण्डा बोकेर अन्तर्राष्ट्रिय क्षेत्रमा फहराउनु जस्तो गर्वको कुरा अरु केही नभएको बताए । उनले खेलकुदमा राज्यको लगानी अति नै न्यून रहेको गुनासो पोखे । उनले खेलकुदमा राज्यले विनियोजन गर्ने रकम कर्मचारीको तलबका लागि मात्रै हुने गरेको बताए । वर्ष उत्कृष्ट खेल पत्रकार अवार्डबाट दिपक परियार सम्मानित भए ।

खेलाडीका लागि कुनै देश हुँदैन: मुख्य मन्त्री नेपाली
गण्डकी प्रदेशका मुख्य मन्त्री कृष्णचन्द्र नेपाली पोखरेलले खेलाडीका लागि कुनै भुगोल नहुने बताए । उनले खेलाडी विश्वमा नै स्वतन्त्र रहेको र कुनै देशको मात्रै नहुने बताएका हुन् ।

‘खेलाडीका लागि कुनै देश हुदैन । विश्वनै खुल्ला छ’ मुख्य मन्त्री नेपालीले भने । उनले गण्डकी प्रदेशलाई खेलकुदको हबको रुपमा विकास गर्न आवश्यक रहेको बताए । उनले गण्डकी प्रदेश सम्भावना नै सम्भावना बोकेको प्रदेश रहेको र उक्त सम्भावना मध्ये खेलकुद पनि एक रहेको सुनाए ।

खेलकुद मनोरञ्जनका लागि मात्रै नभई स्वास्थ्यका लागि समेत उत्तिकै आवश्यक रहेको सुनाउँदै गण्डकी प्रदेश खेलकुदलाई साथमा लिएर अघि बढ्ने विश्वास व्यक्त गरे । गण्डकी प्रदेशका ६० प्रतिशत युवा खेलकुदमा लागेको र यसलाई व्यवसायिक गर्न सके ठुलो फाइदा लिन सकिने उनले बताए ।