काठमाडौं (हाम्रो खेलकुद) – आर्सिया समूहको आयोजना तथा रोयल नेपाल गल्फ क्लबको संयोजनमा पहिलो महिला खुल्ला गल्फ प्रतियोगिता आउदो शनिबार आयोजना हुने भएको छ ।

आयोजकले बिहीबार राजधानीमा पत्रकार सम्मेलनको आयोजना गर्दै एक दिने प्रतियोगिता शनिबार रोयल नेपाल गल्फ क्लबमा हुने जानकारी गराएको छ ।

महिला क्याप्टेन आर्शिया बानु, गल्फर प्रतिमा शेर्पा र मिडिया पर्सन सरिता श्री ज्ञवालीले संयुक्त रुपमा रोयल नेपाल गल्फसँगको सहकार्यमा प्रतियोगिता आयोजना गर्न लागेको हो ।

प्रतियोगितामा ५० भन्दा बढी खेलाडीको सहभागिता रहने आयोजक एवं नेपालको पहिलो नम्बरकी महिला गल्फर प्रतिमा शेर्पाले जानकारी दिइन् । उनका अनुसार प्रतियोगितामा पोखरा, धरान र काठमाडौँका महिला गल्फर सहभागी हुनेछन् ।

प्रतियोगितामा सिनियर र जुनियर गरी दुई समूहमा विभाजन गरेर प्रयियोगिता खेलाइनेछ । सिनियर खेलाडीले १८ होल खेल्नेछन् भने जुनियर खेलाडीले नौ होलमा खेल्नेछन् । जुनियरको उमेर समूह भने ८ देखि १६ वर्षसम्मको हुनेछ ।

प्रतियोगिताको सिनियरतर्फका विजेता खेलाडीले ट्रफिसहित स्कुटर पुरस्कार पाउनेछन् । उक्त प्रतियोगिताको विजेता खेलाडीलाई राष्ट्रपति विद्यादेवी भण्डारीले पुरस्कार प्रदान गर्ने आयोजकले जनाएको छ ।

नेपालमा महिला गल्फ खेलाडीको उत्पादन र महिलालाई गल्फ क्षेत्रमा आकर्षित गर्ने उद्देश्यले प्रतियोगिताको आयोजना गर्न लागिएको आयोजकले जनाएको छ ।